Deputat: “Zayed İnsan Qardaşlığı Mükafatı” Azərbaycanın seçdiyi yolun dünya tərəfindən dəyərləndirildiyinin rəmzidir
Bakı, 6 fevral, AZƏRTAC
Bəzən bir mükafat yalnız bir şəxsə verilən təltif olmur, o, illərlə davam edən zəhmətin, çətin qərarların və böyük məsuliyyətin beynəlxalq miqyasda tanınmasının ifadəsinə çevrilir. Prezident İlham Əliyevin 2026-cı il üzrə “Zayed İnsan Qardaşlığı Mükafatı”na layiq görülməsi də məhz belə hadisələrdəndir.
Bu sözləri AZƏRTAC-a açıqlamasında Milli Məclisin deputatı Ülviyyə Həmzəyeva deyib.
O qeyd edib ki, mükafat, ilk növbədə, sülh ideyasına verilən yüksək dəyərin göstəricisidir. Birləşmiş Ərəb Əmirliklərinin banisi, mərhum Şeyx Zayed bin Sultan Al Nəhyanın adını daşıyan bu nüfuzlu təltif dünyada sülhü, insan qardaşlığını və qarşılıqlı anlayışı real addımlarla təşviq edən liderlərə təqdim olunur. Başqa sözlə, bu mükafat sözlərə deyil, konkret nəticələrə verilən qiymətdir. Prezident İlham Əliyevin sözügedən ali mükafata layiq görülməsi beynəlxalq ictimaiyyətin onun sülhə aparan mürəkkəb, lakin prinsipial siyasi xəttini gördüyünü və dəyərləndirdiyini nümayiş etdirir.
“Uzun illər davam edən münaqişənin sona çatdırılması, yeni regional reallığın formalaşdırılması və bundan sonra sülh gündəliyinin irəli sürülməsi asan qərarlar deyil. Bu yol siyasi iradə, cəsarət və gələcəyi hədəfləyən strateji baxış tələb edirdi. Hazırda Azərbaycan sülh təşəbbüsləri irəli sürən, dialoqa çağıran və regionda sabitliyin təmin olunmasında maraqlı olan ölkədir. Bu mövqenin arxasında ardıcıl dövlət siyasəti və liderin şəxsi məsuliyyəti dayanır. “Zayed İnsan Qardaşlığı Mükafatı” məhz həmin yanaşmanın beynəlxalq səviyyədə qəbul olunduğunu təsdiqləyir. Dövlətimizin başçısının diplomatik təmkini, prinsipial mövqeyi və ən mürəkkəb məsələlərdə belə emosiyalara deyil, rasional qərarlara üstünlük verməsi beynəlxalq aləmdə artıq yaxşı tanınır. Sülhə aparan yolun tələskənlik yox, səbir və ardıcıllıq tələb etdiyini bu siyasət bir daha sübut edir”, - deyə deputat vurğulayıb.
Ülviyyə Həmzəyeva mükafatın Azərbaycanın beynəlxalq imici baxımından da xüsusi əhəmiyyəti olduğuna diqqət çəkərək deyib: “Humanitar dəyərlərə bağlı, dialoqa açıq və qlobal məsuliyyət hissi olan dövlət kimi Azərbaycanın mövqeyi daha da möhkəmlənir. Bu, ölkəmizin beynəlxalq platformalarda səsinin daha aydın eşidilməsinə və mövqelərinin daha ciddi qəbul olunmasına xidmət edir. Lakin bütün beynəlxalq təltiflərdən daha qiymətli bir dəyər var – xalqın etimadı. Prezident İlham Əliyev bu etimadı real nəticələrlə qazanan liderdir. O, xalqın taleyini müəyyən edən ən çətin məqamlarda məsuliyyəti üzərinə götürən, Azərbaycanı Qələbəyə aparan və bu gün də ölkəni inamla gələcəyə doğru yönəldən siyasi iradənin daşıyıcısıdır. Bu baxımdan “Zayed İnsan Qardaşlığı Mükafatı” yalnız beynəlxalq təltif deyil. Mükafat Azərbaycanın seçdiyi yolun - sülh, sabitlik və inkişaf yolunun dünya tərəfindən dəyərləndirildiyinin rəmzidir”.
Bölmənin digər xəbərləri
