SİYASƏT
NAZİRLƏR KABİNETİ MƏTBUAT MƏRKƏZİNİN MƏLUMATI
Sentyabrın 11-də Azərbaycan Respublikasının baş naziri Artur Rasizadə ölkəmizdə səfərdə olan Dünya Turizm Təşkilatının baş katibi cənab Françesko Franjiallini qəbul etmişdir.
Françesko Franjialli səfərin əsas məqsədi barədə Azərbaycanın baş nazirinə məlumat verərək dedi ki, Azərbaycan Respublikası ilə daha yaxından tanış olmaq, ölkəmizin turizm potensialı, tarixi abidələri və füsünkar təbiəti barədə bilavasitə məlumat əldə etmək niyyəti ilə respublikamıza gəlmişdir. Beynəlxalq turizm təşkilatına qəbul olunduğu bir il ərzində respublikamızla intensiv işgüzar əlaqələrin qurulduğunu, dövlət səviyyəsində turizmin inkişafı üçün ölkə daxilində xeyli işlər görüldüyünü məmnunluqla vurğulayan Françesko Franjialli bildirdi ki, onun təmsil etdiyi təşkilat respublikamızda turizmin inkişaf etdirilməsi üçün hər cür kömək göstərəcəkdir.
Ölkəmizdə son illər turizm sahəsinə həqiqətən xüsusi diqqət yetirildiyini vurğulayan Artur Rasizadə qeyd etdi ki, “Turizm haqqında” Qanun qəbul edilmiş, Azərbaycan Respublikasının Prezidenti Heydər Əliyevin Sərəncamı ilə 2002-2005-ci illərdə turizmin inkişafına dair Dövlət Proqramı və onun həyata keçirilməsi üçün Tədbirlər Planı təsdiq olunmuşdur. Həmin Proqrama uyğun olaraq artıq turizm sənayesinin inkişafı ilə bağlı müvafiq işlər aparılır. Turizm baxımından ölkəmizin cəlbedici məskənləri, görməli yerləri barədə qonağa məlumat verən Artur Rasizadə eyni zamanda “İpək Yolu” Proqramı çərçivəsində də beynəlxalq turizm sahəsində Azərbaycanda geniş imkanların mövcud olduğunu qonağın nəzərinə çatdırdı. Baş nazir Artur Rasizadə respublikamızda turizmin inkişafı üçün dövlət səviyyəsində aparılan işlərlə yanaşı Gənclər, İdman və Turizm Nazirliyi ilə Dünya Turizm Təşkilatının birgə səmərəli fəaliyyəti sayəsində də lazımi nəticələrin əldə olunacağına əminliyini bildirdi.