NAZİRLƏR KABİNETİ MƏTBUAT MƏRKƏZİNİN MƏLUMATI
Sentyabrın 13-də Azərbaycan Respublikasının baş naziri Artur Rasizadə ölkəmizdə səfərdə olan Böyük Britaniya parlamenti Lordlar Palatasının üzvü, Dünya Yəhudi Konqresinin vitse-prezidenti lord Caneri qəbul etmişdir.
Respublikamıza səfəri zamanı səmimi qarşılandığına və ona əlverişli iş şəraiti yaradıldığına görə dərin təşəkkürünü bildirən lord Caner baş nazirə öz təəssüratları barədə danışdı. Bir sıra dövlət strukturları ilə tanışlıqdan, dini konfessiyaların və yəhudi icmalarının nümayəndələri ilə görüşdən sonra, müxtəlif millətlərin və etnik qrupların, o cümlədən Yəhudi millətinə məxsus vətəndaşların dinc yanaşı yaşadığı Azərbaycan Respublikasında dini dözümlülüyün yüksək səviyyədə olduğunu məmnunluqla müşahidə etdiyini bildirən qonaq, bütün bunları dövlət tərəfindən aparılan müdrik siyasətin nəticəsi kimi qiymətləndirdi. Baş nazir Artur Rasizadə Azərbaycanda tarixən yəhudi icmalarının yaşadığını və yerli əhali ilə mehriban münasibətlərdə olduğunu xatırladaraq, bu gün ölkəmizdə dini icmalarla və milli azlıqlarla bağlı heç bir problemin müşahidə olunmadığını nəzərə çatdırdı. Sonra respublikamızın iqtisadi-sosial durumu barədə qonağa məlumat verən Artur Rasizadə müstəqillik əldə etdikdən sonra ölkəmizin demokratik, dünyəvi, hüquqi dövlət quruculuğu yolu ilə inamla addımladığını vurğuladı. İqtisadi islahatların gedişi barədə danışarkən baş nazir Artur Rasizadə Ermənistanın hərbi təcavüzünün ağır nəticələrini nəzərə çatdıraraq bildirdi ki, indi qarşımızda duran ən böyük problem torpaqlarımızın erməni işğalından azad edilməsi və bir milyon didərgin soydaşımızın öz doğma yurd-yuvalarına qaytarılmasıdır.
Səmimilik şəraitində keçən görüş zamanı bir sıra digər məsələlər ətrafında da fikir mübadiləsi aparıldı.
Bölmənin digər xəbərləri
