NEFT AKADEMİYASINDA ÇİNLİ TƏLƏBƏLƏRİN SAYI ARTIRILACAQ
Dekabrın 6-da Azərbaycan Dövlət Neft Akademiyasında bu ali təhsil ocağı ilə Çin Neft Universiteti arasında bağlanmış “Birgə kadr hazırlığı üzrə əməkdaşlıq” müqaviləsinin icrasına dair görüş keçirilmişdir.
Dövlət Neft Akademiyasından AZƏRTAC-ın müxbirinə demişlər ki, rektor, professor Siyavuş Qarayev akademiyanın beynəlxalq əlaqələrini diqqətə çatdıraraq Çin Xalq Respublikası ilə təhsil sahəsindəki əməkdaşlığın uğurlarını xüsusi vurğuladı, dövlətimizin başçısı Heydər Əliyevin 1994-cü ildə ÇXR-ə rəsmi səfərindən sonra bu əməkdaşlığın daha da genişləndiyini bildirdi.
Rektor dedi ki, cari tədris ilində akademiyanın əcnəbi vətəndaşlar üçün hazırlıq fakültəsində 45 çinli gənc təhsil alır, növbəti dərs ilində onların sayını 60-a çatdırmaq nəzərdə tutur.
Təhsil naziri, professor Misir Mərdanov ölkəmizdə yüksək ixtisaslı kadrların hazırlanmasında akademiyanın müstəsna rolundan söhbət açdı. Burada çinli tələbələrin təhsil almalarının əhəmiyyətini xüsusi vurğuladı.
ÇXR-in Bakıdakı fövqəladə və səlahiyyətli səfiri Çjan Siyun ölkələrimiz arasında elm və təhsil sahəsində əlaqələrdən danışaraq onun daha da inkişaf etdiriləcəyinə əminliyini bildirdi.
Çinli tələbələr çıxış edərək burada onlara yaxşı şərait yaradıldığını söylədilər.
Sonra görüş iştirakçıları akademiyanın muzeyləri və tələbə şəhərciyində çinli tələbələrin yaşayış şəraiti ilə tanış oldular.
Bölmənin digər xəbərləri
