Nəqliyyat, rabitə və yüksək texnologiyalar naziri Rumıniyanın Baş nazirinin müavini ilə görüşüb
Bakı, 16 mart, AZƏRTAC
Nəqliyyat, rabitə və yüksək texnologiyalar naziri Ramin Quluzadə Rumıniyanın Baş nazirinin müavini xanım Ana Birçall ilə görüşüb.
Nazirlikdən AZƏRTAC-a bildirilib ki, görüşdə Avropa İttifaqı ölkələrinin qabaqcıl təcrübəsini nəzərə alaraq, ölkəmizdə yüksək texnologiyaların inkişafı, nəqliyyat əməliyyatlarında informasiya-kommunikasiya texnologiyalarının tətbiqi, iki ölkə arasında avtomobil, dəniz nəqliyyatı və mülki aviasiya sahəsində əməkdaşlığın daha da aktivləşləşdirilməsi müzakirə olunub.
Bildirilib ki, hazırda Azərbaycan-Rumıniya arasında əlaqələr müxtəlif sahələrdə o cümlədən nəqliyyat və İKT sahələrində davamlı olaraq inkişaf edir.
Nazir Ramin Quluzadə qeyd edib ki, Rumıniya tərəfinin Transxəzər Beynəlxalq Nəqliyyat Marşrutu layihəsinə, eləcə də ölkəmizin imzaladığı Əfqanıstan, Türkmənistan, Azərbaycan, Gürcüstan və Türkiyə arasında “Tranzit ticarət və nəqliyyat üzrə əməkdaşlıq haqqında” Sazişə qoşulması bu sahədə əlaqələrin daha da genişləndirilməsinə mühüm töhfə verəcək.
Rumıniyanın Baş nazirinin müavini xanım Ana Birçall isə birgə əməkdaşlığın qarşılıqlı marağa əsaslanan əlaqələrin möhkəmləndirilməsinə xidmət edəcəyini qeyd edib.
Bölmənin digər xəbərləri
