NORVEÇİN XARİCİ İŞLƏR NAZİRİ AZƏRBAYCANDAKI SEÇKİQABAĞI VƏZİYYƏTİ YÜKSƏK QİYMƏTLƏNDİRMİŞDİR
Norveç hökuməti Azərbaycanda həyata keçirilən hüquqi, demokratik islahatları diqqətlə izləyir və əldə olunan uğurlardan razıdır.
AZƏRTAC xəbər verir ki, bu sözləri Bakıda səfərdə olan Norveçin xarici işlər naziri Yonas Qar Störe aprelin 29-da keçirdiyi brifinqdə demişdir.
Diplomat bildirmişdir ki, Azərbaycan ATƏT-ə və Avropa Şurasına üzv olduqdan sonra çox sürətli inkişaf etmişdir. Bu gün ölkədə insan hüquqları, demokratiya, eləcə də iqtisadi sahədə çox uğurlu nəticələr vardır.
Yonas Qar Störe demişdir ki, beynəlxalq ictimaiyyət Cənubi Qafqaz respublikalarına xüsusi diqqət yetirir. Beynəlxalq müşahidəçilər Gürcüstanda və Ermənistanda keçirilmiş seçkilərin nəticələrini və ümumiyyətlə seçki prosesini ciddi tənqid etmişlər. İndi isə dünyanın diqqəti Azərbaycandadır. Ona görə də hesab edirəm ki, Azərbaycan hökuməti qarşıdakı prezident seçkisini azad, demokratik və şəffaf keçəcəkdir.
Diplomat Azərbaycanda seçkiqabağı vəziyyəti yüksək qiymətləndirmişdir.
Bölmənin digər xəbərləri
