NÜMUNƏLƏRİN MÜAYİNƏSİ AZƏRBAYCANDA “QUŞ QRİPİ” XƏSTƏLİYİNİN OLMADIĞINI GÖSTƏRMİŞDİR
Dövlət Baytarlıq Xidmətinin mətbuat mərkəzindən AZƏRTAC-a bildirmişlər ki, ölkə ərazisində “quş qripi” ilə əlaqədar bu ilin sonuncu monitorinqi zamanı götürülmüş nümunələrin müayinəsi başa çatmışdır.
Respublika Baytarlıq Laboratoriyasının mütəxəssisləri 28 çöl quşunun patoloji materialını, 2355 ev quşunun qan nümunələrini müayinə etmişlər. Nümunələrin heç birində “quş qripi” xəstəliyinin daşıyıcısına təsadüf edilməmişdir.
Monitorinq Ekologiya və Təbii Sərvətlər, Səhiyyə nazirliklərinin, eləcə də Ovçular Cəmiyyətinin mütəxəssis və əməkdaşları ilə birlikdə əsasən Abşeron yarımadası və Pirallahı adasında, Dəvəçi, Salyan, Ağcabədi, Lənkəran rayonlarındakı milli qoruq və parklarda aparılmışdır.
Dövlət Baytarlıq Xidməti respublika ərazisində monitorinqləri bundan sonra da davam etdirəcəkdir. Növbəti monitorinqə yanvarın 14-də başlamaq nəzərdə tutulmuşdur.
Qurum köçəri quşların miqrasiyası ilə əlaqədar ev quşlarının qapalı şəraitdə saxlanılmasını tövsiyə edir. Köçəri və çöl quşlarının ovlanılması, satılması və onlardan qida məhsulu kimi istifadə edilməsi qəti qadağandır.
Hazırda respublikada “quş qripi” ilə əlaqədar epizootik vəziyyət sabitdir. Bu sabitliyi qoruyub saxlamaq üçün əlaqədar qurumlarla birgə lazımi tədbirlər görülür.
Bölmənin digər xəbərləri
