Mərziyə Davudova adına Mingəçevir Dövlət Dram Teatrında “Heydər Əliyev Universiteti”nin 42-ci məşğələsi olmuşdur. Məşğələdə 700 dinləyici iştirak etmişdir. Mingəçevir Şəhər İcra Hakimiyyətinin başçısı Məhəbbət Qarabağlının “Heydər Əliyev dünənimizin, bu günümüzün və sabahımızın tarixi şəxsiyyətidir”, “Azərenerji” Səhmdar Cəmiyyətinin prezidenti Etibar Pirverdiyevin “Heydər Əliyev Azərbaycan energetikasının banisi və qurucusudur”, Milli Məclisin deputatı, Dövlət İqtisad Universitetinin rektoru, akademik Əli Abbasovun “İlham Əliyevin Avropa Şurasındakı uğurları Heydər Əliyev siyasətinin davamıdır” mövzusunda məruzələri böyük diqqət və maraqla dinlənilmişdir. Məruzələrdə xüsusi vurğulanmışdır ki, Azərbaycanın dövlət müstəqilliyinin bərqərar olması, sivil dünya birliyində öz layiqli yerini tutması, ölkəmizdə hökm sürən ictimai-siyasi sabitlik, sosial-iqtisadi tərəqqi, elm, mədəniyyət, təhsil və səhiyyənin inkişafı Heydər Əliyevin müstəsna fəaliyyətinin, uğurlu daxili və xarici siyasətinin bəhrəsidir. Qeyd olunmuşdur ki, ölkəmizin dördüncü böyük sənaye və yaşayış mərkəzi olan Mingəçevirin inkişafı Heydər Əliyevin adı ilə bağlıdır. Bu gün şəhərdə mövcud olan sənaye müəssisələrinin, yaşayış evlərinin, elm, təhsil, səhiyyə və mədəniyyət obyektlərinin 70 faizi Heydər Əliyevin ölkəmizə rəhbərlik etdiyi son 34 ildə tikilib qurulmuşdur. Xüsusən, hazırda üç min nəfərin çalışdığı, ölkəmizdə hasil olunan elektrik enerjisinin yarıdan çoxunun istehsal edildiyi Azərbaycan Dövlət Rayon Elektrik Stansiyası Heydər Əliyevin uzaqgörən, milli qeyrət, vətəndaş təəssübkeşliyinə söykənən ağıl və zəkasının məhsuludur. Natiqlər Azərbaycanın yeni neft strategiyasının işlənib hazırlanması və uğurla həyata keçirilməsində, ölkəmizdə milli Olimpiya hərəkatının genişlənməsində, çoxminlik gənclər ordusunun Yeni Azərbaycan Partiyası ətrafında sıx birləşməsində, Azərbaycanın Avropa Şurasında ədalətli mövqeyinin prinsipial müdafiəsində, Qarabağ probleminin dinc, siyasi danışıqlar yolu ilə nizamlanması prosesində Milli Məclisin deputatı, Dövlət Neft Şirkətinin birinci vitse-prezidenti, Avropa Şurası Parlament Assambleyası sədrinin müavini və Büro üzvü İlham Əliyevin səmərəli, coşğun fəaliyyətini yüksək qiymətləndirmiş, onun qarşıdan gələn prezident seçkilərində namizədliyinin qeydə alınmasını ümumxalq fikir və arzusunun ifadəsi kimi qiymətləndirmişlər. Mingəçevirlilər xalqın inandığı, etibar etdiyi Yeni Azərbaycan Partiyasının namizədlərinə səs verməklə, həm də ölkəmizin işıqlı gələcəyinə səs vermiş olacaqlar. Sonra Azərbaycan Dövlət Rayon Elektrik Stansiyasında şəhid ailələri ilə görüş olmuşdur. 476 şəhid ailəsinə 100 milyon manatlıq ərzaq bağlamaları paylanmışdır. Şəhid ailələrinin üzvləri onlara göstərdiyi daimi diqqət və qayğıya görə Azərbaycan Prezidenti Heydər Əliyevə sonsuz minnətdarlığını bildirmişlər. Qeyd etmişlər ki, onlar qarşıdan gələn prezident seçkilərində ölkəmizdə ictimai-siyasi sabitliyin, sosial-iqtisadi tərəqqinin yeganə təminatçısı olan Heydər Əliyevə səs verəcəklər. Qonaqlar son vaxtlar şəhərdə gedən quruculuq, abadlıq işləri ilə də tanış olmuş, prezident seçkiləri ərəfəsində Mingəçevirdə yaranmış siyasi fəallıqdan və yüksək əhval-ruhiyyədən razı qaldıqlarını bildirmiş, belə yaddaqalan görüşlərin zəruriliyini qeyd etmişlər. Elə həmin gün Mingəçevirin mərkəzi İstiqlal meydanında respublika incəsənət ustalarının böyük konserti olmuşdur. Sənətçilərimiz nur şəhərinin sakinlərinə sevincli, fərəh dolu bir axşam bəxş etmişlər.