Nyu-Cersidə partlayıcı maddələrin aşkarlanması səbəbindən parad ləğv edilib
Vaşinqton, 3 sentyabr, AZƏRTAC
Nyu-Cersi ştatının Saut-Pleynfild şəhərində Əmək Günü münasibətilə hər il təşkil olunan parad ləğv edilib. Buna səbəb paradın marşrutu boyunca meşə sahəsindən keçən hissədə əldəqayırma partlayıcı maddələrin aşkar edilməsi olub.
AZƏRTAC bu barədə “USA Today” qəzetinə istinadla xəbər verir.
Nyu-Cersinin qubernatoru Fil Merfi və onun həyat yoldaşı Temmi səhər saat 10-da başlanacaq 62-ci illik paradda iştirak etməli idilər.
Ştatın hüquq-mühafizə orqanlarının nümayəndələri parad marşrutunun başlanğıcında yerləşən, Tomas Kayzerə məxsus evin ərazisində fişəngə oxşar bir neçə əldəqayırma qurğu aşkarlayıblar. Midlseks və Monmut dairələri prokurorluqlarının birgə bəyanatında bildirilir ki, Kayzer həbs edilib, ona ikinci və üçüncü dərəcəli destruktiv qurğulara qanunsuz yiyələnmə ittihamı irəli sürülüb.
Polisdə bildiriblər ki, qubernator Merfiyə və ya parada münasibətdə Kayzer tərəfindən birbaşa təhdidlər olmayıb.
Saut-Pleynfild Midlseks dairəsində, Nyu-Yorkdan təxminən 60 kilometr cənub-şərqdə yerləşir.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
