Ölkəmizin elmi reytinqinin dünya səviyyəsində artırılması üçün AMEA tərəfindən mühüm addımlar atılır
Bakı, 18 aprel, P.İmanova, AZƏRTAC
Aprelin 18-də Azərbaycan Milli Elmlər Akademiyası (AMEA) Rəyasət Heyətinin növbəti iclası keçirilib.
AZƏRTAC xəbər verir ki, əvvəlcə AMEA-nın prezidenti, akademik Akif Əlizadə gündəlikdəki məsələləri diqqətə çatdırıb.
Prezident İlham Əliyevin “Azərbaycan Respublikasında “Elm günü”nün təsis edilməsi haqqında” müvafiq Sərəncamından söz açan A.Əlizadə belə bir günün təsis edilməsinin Azərbaycan elminə böyük diqqət və qayğının parlaq nümunəsi olduğunu vurğulayıb. Akademik hər il martın 27-nin ölkəmizdə “Elm günü” kimi qeyd ediləcəyini bildirib.
Sonra akademik M.Nağıyev adına Kataliz və Qeyri-üzvi Kimya İnstitutu direktorunun elmi işlər üzrə müavini, AMEA-nın müxbir üzvü Məhəmməd Babanlının “Yüksək texnologiyalar üçün unikal qeyri-üzvi materiallar olan topoloji izolyatorların sintezində və dizaynında yeni yanaşmalar. Nailiyyətlər və perspektivlər” mövzusunda məruzəsi dinlənilərək müzakirə edilib. Bu sahədə multidissiplinar tədqiqatların əlaqələndirilməsinə dair tapşırıq verilib. Həmçinin bu istiqamətdə beynəlxalq elmi əlaqələrin genişləndirilməsi, magistr və fəlsəfə doktorluğu üzrə kadr hazırlığının gücləndirilməsi qərara alınıb.
AMEA-da elmi jurnalların nəşrinin təkmilləşdirilməsi ilə bağlı çıxış edən akademik Akif Əlizadə bildirib ki, bu qurumda nəşr olunan jurnalların keyfiyyətinin daha da yaxşılaşdırılması, onların müasir tələblərə uyğun tərtibatı, beynəlxalq elmi bazalara çıxışı və beynəlxalq indekslərdə tanıdılması həlli vacib olan məsələlərdəndir. Bu məqsədlə Rəyasət Heyəti AMEA-nın elmi nəşriyyat şurasına elmi jurnalların nəşrinin təkmilləşdirilməsinə dair təkliflərin hazırlanıb təqdim edilməsi ilə bağlı tapşırıq verib.
AMEA Rəyasət Heyəti aparatı Elm və Təhsil İdarəsinin elmi-analitik şöbəsinin rəisi Fail Kazımov akademiyanın beynəlxalq elmi bazalarda bibliometrik göstəricilərinin analitik təhlilinin nəticələri haqqında təqdimatla çıxış edib. O, son illər ölkəmizin elmi reytinqinin həm regional, həm də dünya səviyyəsində artırılması üçün AMEA tərəfindən mühüm tədbirlərin həyata keçirildiyini bildirib.
F.Kazımov beynəlxalq elmi bazalarla əməkdaşlığın genişləndirilməsi istiqamətində AMEA-nın “Clarivate Analytics” təşkilatı ilə əlaqələrindən söz açıb. Hər iki təşkilat arasında imzalanmış sazişə əsasən AMEA-nın alimlərinin “Web of Science” bazasından istifadə etmək imkanı əldə etdiyini qeyd deyib. Hazırda bu bazada AMEA-nın və onun 21 elmi müəssisəsinin vahid profilinin olduğunu deyən F.Kazımov bu profillər vasitəsilə AMEA-nın əməkdaşlarının və elmi müəssisələrinin nəşr fəallığı, h-indeksi və istinad göstəricilərinin asanlıqla müəyyənləşdirildiyini bildirib.
Müzakirədən sonra Elm və Təhsil İdarəsi tərəfindən hazırlanan, AMEA-nın beynəlxalq elmi bazalarda bibliometrik göstəricilərinin analitik təhlilinin nəticələri haqqında hesabatı nəzərə alınıb. Bibliometrik göstəricilərin yaxşılaşdırılması istiqamətində müvafiq tədbirlərin həyata keçirilməsi, bu göstəricilərin müntəzəm təhlil olunmasına dair tapşırıqlar verilib.
Daha sonra iclasda fiziki və riyazi modelləşdirmə üçün “Milli GRİD” infrastrukturunun inkişafı haqqında məsələ müzakirə olunub. AMEA Fizika-Riyaziyyat və Texnika Elmləri Bölməsinin akademik-katibi, akademik Nazim Məmmədov Azərbaycanda ilk dəfə “Milli GRİD” İnformasiya və Hesablama Mərkəzinin (“Milli GRİD” İHM) 2008-ci ildə yaradıldığını xatırladıb. Bildirilib ki, bu istiqamətdə sıx elmi əlaqələr quran Fizika İnstitutu uzun illərdir CERN və BNTİ ilə birgə elmi-tədqiqat işləri aparır. Alim “Milli GRİD” İHM-in ölkəmizin elm və tədris müəssisələri tərəfindən geniş istifadə edildiyini diqqətə çatdırıb. N.Məmmədov təcrübi və nəzəri tədqiqatların riyazi modelləşdirilməsi və hesablama resurslarına olan tələbatın artmasını nəzərə alaraq, Fizika və İnformasiya Texnologiyaları institutlarının mütəxəssisləri tərəfindən Fizika İnstitutundakı 1-ci Milli GRİD seqmentinin təkmilləşdirilməsi və İnformasiya Texnologiyaları İnstitutunda 2-ci Milli GRİD seqmentinin yaradılmasının nəzərdə tutulduğunu deyib.
Qeyd edilib ki, AMEA-da GRİD infrastrukturunun inkişaf etdirilməsi dünya informasiya texnologiyalarının inkişaf tendensiyasına tam uyğundur və adekvat informasiya-hesablama resurslarının mövcudluğunu tələb edən elmi fəaliyyət sahələrinin ehtiyaclarını ödəyə bilər.
Rəyasət Heyəti tanınmış elm xadimi, mərhum akademik Mahmud Kərimovun 70 illik yubileyi münasibətilə beynəlxalq elmi konfransın keçirilməsini qərara alıb.
İclasda bir sıra elmi-təşkilati məsələlərə baxılıb.
Bölmənin digər xəbərləri
