Ötən il Hökumət Ödəniş Portalı vasitəsilə 85 milyon əməliyyat aparılıb
Bakı, 14 fevral, AZƏRTAC
Hazırda Mərkəzi Bankın operatoru olduğu Hökumət Ödəniş Portalına (HÖP) inteqrasiya olunmuş qurumlar üzrə 1100-dən çox xidmət üzrə ödənişlərin toplanılması təmin olunur.
AZƏRTAC Mərkəzi Banka istinadla xəbər verir ki, 2022-ci il ərzində HÖP vasitəsilə həyata keçirilən əməliyyatların sayı 2021-ci illə müqayisədə 42 faiz artaraq 85 milyon ədəd, həcmi isə 23 faiz artaraq 5 milyard manat olub. Əməliyyatların say üzrə 62 faizi, həcm üzrə isə 66 faizi nağdsız formada aparılıb.
2022-ci ilin sonuna HÖP-ə 11 mərkəzi icra hakimiyyəti orqanı, Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondu, İqtisadiyyat Nazirliyi yanında Dövlət Vergi Xidməti, İqtisadiyyat Nazirliyi yanında Əmlak Məsələləri Dövlət Xidməti, 4 kommunal xidməti müəssisəsi, 5 stasionar və mobil rabitə operatoru, “Elektron Məhkəmə” portalı üzərindən 122 məhkəmə orqanı, İcbari Sığorta Bürosu vasitəsilə 19 sığorta şirkəti, Əmanətlərin Sığortalanması Fondu, İpoteka və Kredit Zəmanət Fondu, Əqli Mülkiyyət Agentliyi, İcbari Tibbi Sığorta üzrə Dövlət Agentliyi, Bakı Nəqliyyat Agentliyi, Milli Sertifikat Xidmətləri Mərkəzi, Dövlət İmtahan Mərkəzi və 100-dən çox ali və orta ixtisas təhsil müəssisəsi, 1438 bələdiyyə orqanı inteqrasiya olunub.
Bölmənin digər xəbərləri
