Özbəkistan Prezidenti 2019-cu ili “Fəal investisiya və sosial inkişaf ili” adlandırıb
Daşkənd, 28 dekabr, АZƏRTAC
Dekabrın 28-də Özbəkistan Prezidenti Şavkat Mirziyoyev ölkə parlamentinə illik müraciət edib.
AZƏRTAC xəbər verir ki, paytaxtdakı Simpoziumlar Sarayında keçirilən tədbirdə Özbəkistan parlamentinin Ali Məclisi və Senatının deputatları, Hökumət üzvləri, səfirlər və beynəlxalq təşkilatların nümayəndələri, jurnalistlər iştirak ediblər.
İclasda Azərbaycanın Özbəkistandakı səfiri Hüseyn Quliyev də olub.
Dövlət başçısı 2018-ci ildə görülən işlər, 2019-cu ildə qarşıda duran vəzifələr haqqında ətraflı məlumat verib. Bildirib ki, gələn il 2018-ci ildə başlanan layihə və proqramlar davam etdiriləcək. Şavkat Mirziyoyevin sözlərinə görə, dünya təcrübəsi göstərir ki, fəal investisiya siyasəti aparan ölkələr iqtisadiyyatın inkişafında böyük uğurlar əldə edir.
İqtisadiyyata yeni texnologiyaların və yüksək ixtisaslı mütəxəssislərin cəlb olunması da əsas istiqamətlərdən biridir, - deyən dövlət başçısı sosial sahənin inkişafı, əhalinin həyat şəraitinin yaxşılaşdırılması, onların sağlam həyat tərzi keçirməsi, gənclərin yaxşı təhsil almaları istiqamətində görüləcək layihələrdən də danışıb.
Prezident 2019-cu ili “Fəal investisiya və sosial inkişaf ili” adlandırıb.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
