Pakistanın Belucistan əyalətində baş vermiş sel və daşqınlar nəticəsində 3 nəfər həlak olub
Bakı, 21 fevral, AZƏRTAC
Pakistanın Belucistan əyalətində baş vermiş sel və daşqınlar nəticəsində 3 nəfər həlak olub, təxminən 200 nəfər itkin düşüb, 450-dən çox ailə evlərini tərk edib.
AZƏRTAC “DawnNews” telekanalına istinadla xəbər verir ki, təbii fəlakət kommunikasiya infrastrukturlarının sıradan çıxmasına səbəb olub. Əyalətin Fəlakətlərin İdarə Edilməsi Mərkəzinin direktoru İmran Zərkun bildirib ki, 3 nəfərin həlak olduğu və 200 sakinin təxliyə edildiyi Lasbela yaşayış məntəqəsində evlərin çoxunu sel aparıb. İnsanların sığınması üçün yaxınlıqdakı ərazidə çadırlar qurulub. Onun sözlərinə görə, xilasedicilər itkin düşmüş insanları tapmaq üçün ərazidə axtarış-xilasetmə işləri aparırlar.
Belucistanın dağlıq ərazilərində isə qar uçqunları nəticəsində yollar bağlanıb. Yolların açılması və sel baş vermiş kəndlərdən əhalinin təxliyəsinə hərbçilər də cəlb olunub.
Bölmənin digər xəbərləri
