PEKİN OLİMPİADASININ ON İKİNCİ GÜNÜ
AZƏRTAC xəbər verir ki, avqustun 20-də Olimpiadada Azərbaycanın iki idmançısı - iki sərbəst güləşçilər Emin Əzizov (66 kiloqram) və Çamsulvar Çamsulvarayev (74 kiloqram) çıxış etmişlər. Emin 1/16 finalda İsveçrə idmançısı Qriqori Sarasinə qalib gəlsə də, növbəti qarşılaşmada belaruslu Murad Heydərova məğlub olmuşdur. Çamsulvarayev də 1/8 finalda uduzmuşdur.
Avqustun 21-də 1/16 finalda sərbəst güləşçimiz Xetaq Qazyumov (96 kiloqram) Mateuş Qukman (Polşa) ilə görüşəcəkdir. Digər Azərbaycan nümayəndəsi Novruz Temrezov (84 kiloqram) həmin mərhələdə Çaqnadori Qanzoriq (Monqolustan) ilə güləşəcəkdir. Sərbəst güləşçimiz Əli İsayevin (120 kiloqram) 1/8 finalda rəqibi Özbəkistan idmançısı Artur Taymazov olacaqdır.
Həmin gün bədii gimnastika üzrə fərdi çıxışlar və qrup yarışları keçiriləcəkdir. Təsnifat yarışında Aliyə Qarayeva və Dinara Gimatova çıxış edəcəklər. Qrupların təsnifat yarışında Vəfa Hüseynova, Alyona Tryopina, Anna Bitiyeva, Anastasiya Prosolova, Valeriya Yeqay, Dina Qorina yarışacaqlar.
Taekvondoçuların da rəqibləri məlumdur. Bu növdə Azərbaycanın yeganə təmsilçisi Rəşad Əhmədov (80 kiloqram) yarışlara Qətərin nümayəndəsi Sərxan Əbdülqadir Hikmət ilə görüşlə başlayacaqdır.
Xatırladaq ki, Olimpiadanın ötən on günü ərzində idmançılarımız bir qızıl, iki gümüş və iki bürünc medal qazanmışlar. Boks yarışlarında bir medalımız olacaq. Onu hələlik yarımfinalda yarışacaq Şahin İmranovdan gözləyirik.
Bölmənin digər xəbərləri
