Pekində 56 günlük fasilədən sonra yenidən COVID-19-a yoluxma qeydə alınıb
Pekin, 12 iyun, AZƏRTAC
Çin paytaxtında 56 günlük fasilədən sonra yenidən COVID-19 virusuna daxili ötürülmə yolu ilə yoluxmalar qeydə alınmağa başlayıb.
AZƏRTAC xəbər verir ki, iyunun 11-də və 12-də şəhərdə 3 nəfərin virusa yoluxması aşkarlanıb. Virusa son yoluxan 3 nəfərdən ikisinin son 14 gün ərzində Pekindən kənara çıxmadığı bildirilsə də, digər şəxsin ötən günlərdə Şandon vilayətinin Çinado şəhərinə səfər etdiyi məlum olub. Hazırda səlahiyyətli qurumlar bu şəxslərin hansı yolla virusa yoluxmalarını araşdırır. Onların yaşadıqları məhəllələrin sakinləri tibbi nəzarət altına alınıb.
Pekin hökumətinin təhsil komissiyası şəhərdə yenidən virusa yoluxma hallarının aşkarlanmasından sonra orta məktəblərin 1-3-cü sinif şagirdləri üçün iyunun 15-də dərslərin başlaması ilə bağlı qərarını ləğv edib.
Qeyd edək ki, Pekində daxili ötürülmə yolu ilə yeni növ koronavirusa yoluxmuş sonuncu xəstə sağaldıqdan sonra iyunun 8-də evə buraxılıb. Bununla da şəhərdə virusa yoluxmuş şəxsin qalmadığı açıqlanmışdı.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
