Peru Konqresi Xocalı soyqırımının ildönümü ilə bağlı bəyanat qəbul edib
Bakı, 27 fevral, AZƏRTAC
Peru Konqresində Xocalı soyqırımı qurbanlarının xatirəsi anılıb və faciə ilə bağlı bəyanat qəbul edilib.
Azərbaycan Respublikasının Meksikadakı səfirliyindən AZƏRTAC-a bildirilib ki, Xocalı soyqırımının 33-cü ildönümü ilə əlaqədar keçirilən tədbirdə Peru-Azərbaycan parlamentlərarası dostluq qrupunun üzvləri, Peruda akkreditə olunmuş diplomatik korpus və yerli KİV-lərin nümayəndələri iştirak ediblər.
Əvvəlcə soyqırımı qurbanlarının xatirəsi bir dəqiqəlik sükutla yad edilib.
Sonra səfirliyin əməkdaşı Gültən Qafqazlı-Novruzova Xocalı soyqırımı və erməni təcavüzünün tarixi haqqında məlumat verərək, bu qətliam və onun acı nəticələrinin unudulmaması, habelə gələcəkdə oxşar faciələrin baş verməməsi üçün soyqırımı törədənlərin hamısının məsuliyyətə cəlb olunmasının vacibliyini vurğulayıb.
Diplomat Xocalı faciəsinə lazımi hüquqi qiymət verildiyini, bir sıra ölkələrin parlamentləri, o cümlədən Peru Konqresi tərəfindən Xocalı soyqırımını tanıyan sənədlərin qəbul edildiyini diqqətə çatdırıb, bu məsələdə ədalətli mövqe və həmrəylik nümayiş etdirdiyi üçün Peru tərəfinə minnətdarlığını bildirib.
Konqresin Peru-Azərbaycan parlamentlərarası dostluq qrupunun üzvü Luis Arturo Aleqria Qarsia Xocalıda həlak olmuş günahsız soydaşlarımızla bağlı Azərbaycan xalqına başsağlığı verib. O, Xocalı soyqırımının Azərbaycan xalqının yaddaşında dərin iz qoyduğunu qeyd edərək, Peru Konqresi tərəfindən faciənin 33-cü ildönümü ilə bağlı qəbul edilmiş bəyanatın mətnini oxuyub.
Bəyanatda Xocalı soyqırımının 33-cü ildönümünün anıldığı diqqətə çatdırılıb. Həmçinin çox sayda insanın amansızlıqla qətlə yetirilməsi ilə nəticələnmiş faciə haqqında məlumat verilib, 2013-cü ildə Peru Konqresi tərəfindən qəbul edilmiş sənəddə bu soyqırımının pisləndiyi bildirilib.
Soyqırımı aktının çoxsaylı beynəlxalq insan hüquqları təşkilatları tərəfindən tam şəkildə sənədləşdirildiyi, “Human Rights Watch” tərəfindən isə “münaqişə zamanı törədilmiş ən qanlı genosid” olaraq qeydə alındığı vurğulanıb.
Bundan başqa, bəyanatda dünya azərbaycanlılarının Xocalı şəhərində qətlə yetirilmiş günahsız insanların xatirəsini ehtiramla yad etdiyi bildirilib, onların əziz xatirəsinə, baş vermiş faciənin 33-cü ildönümünün anılması ilə əlaqədar Azərbaycan hökumətinə və xalqına dərin hüznlə başsağlığı ifadə olunub.
Tədbir zamanı Xocalı soyqırımı haqqında sənədli film nümayiş etdirilib, iştirakçılara faciənin tarixinə dair broşür və materiallar təqdim olunub.
Bölmənin digər xəbərləri
