Peyntbol üzrə muxtar respublika birinciliyinin qalibləri müəyyənləşib
Naxçıvan, 22 aprel, AZƏRTAC
Naxçıvan Muxtar Respublikası Atıcılıq Mərkəzində ali və orta ixtisas təhsili müəssisələrinin tələbələri arasında keçirilən peyntbol üzrə muxtar respublika birinciliyinə yekun vurulub.
AZƏRTAC-ın Naxçıvan bürosu xəbər verir ki, Naxçıvan Muxtar Respublikası Gənclər və İdman Nazirliyi ilə Atıcılıq Federasiyasının birgə təşkil etdiyi birincilikdə 7 komanda mübarizə aparıb.
Birinciliyin açılış mərasimində Naxçıvan Muxtar Respublikasının gənclər və idman naziri Azad Cabbarov və Atıcılıq Federasiyasının sədri Səhət Həbibbəyli çıxış edərək, ölkəmizdə, eləcə də muxtar respublikada idmana və idmançılara göstərilən dövlət qayğısından danışıblar.
Çıxış edənlər Naxçıvan Muxtar Respublikası Ali Məclisinin Sədrinə minnətdarlıq edərək atıcılıq idman növünün inkişafı istiqamətində qarşıya qoyulmuş vəzifələrin layiqincə yerinə yetiriləcəyini, atıcılığın muxtar respublikada ən çox sevilən idman növlərindən biri səviyyəsinə qaldırılacağını deyiblər.
Sonra yarışlara start verilib. Yarışın yekun nəticəsinə əsasən, Naxçıvan Dövlət Universitetinin komandası qalib adını qazanıb. Naxçıvan Dövlət Texniki Kollecinin komandası ikinci, Naxçıvan Tibb Kollecinin komandası isə üçüncü olub.
Qalib komandalar diplom, peyntbol mərmiləri və hədiyyələrlə mükafatlandırılıblar.
Bölmənin digər xəbərləri
