PİYLƏNMƏ ALTSHEYMER XƏSTƏLİYİNƏ SƏBƏB OLA BİLƏR

08.04.2006 [20:24]
Çap et
A⁺ A^-

AZƏRTAC xəbər verir ki, tosqun adamların və yaxud piylənmədən əziyyət çəkənlərin 40 yaşlarında Altsheymer xəstəliyinə tutulma təhlükəsi var. Kayzer Permanent Tədqiqat İnstitutunun alimləri (Kaliforniya, ABŞ) 30 il ərzində 8776 nəfər üzərində apardıqları müşahidələr nəticəsində bu qənaətə gəlmişlər. 1964-cü ildə başlanan araşdırmalar zamanı alimlər çiynin üçbaşlı əzələsi üstündəki dəri büküşünün qalınlığını ölçmək yolu ilə 40-45 yaşlı kişı və qadınların orqanizmində piyin miqdarını müəyyən etmişlər.

Araşdırma iştirakçılarının 60-65 yaşlı 221 nəfərində Altsheymer xəstəliyi tapılmışdır. Alimlər müəyyən etmişlər ki, 40 yaşında dərisində qırışlar həddindən artıq qalın olan adamların Altsheymer xəstəliyinə tutulması təhlükəsi arıqlara nisbətən 3 dəfə çoxdur. Araşdırmaların müəllifi Reyçel Uitmer demişdir: “Hələ təsdiqə ehtiyacı olan bu məlumatlar göstərir ki, orta yaşlarında çəkinin azalması yaşa dolduqca aydın təfəkkürü saxlamağa kömək edir”.

Altsheymer xəstəliyi beynin inkişaf edən degenerativ xəstəliyidir: Onun əsas əlaməti intellektin zəifləməsidir. Xəstəlik inkişaf etdikcə yaddaş və diqqət zəifləyir, təfəkkür, qavrama qabiliyyəti prosesləri pozulur, məkan və zaman baxımından oriyentasiya itirilir. Təkcə ABŞ-da Altsheymer xəstəliyindən təxminən 4,5 milyon adam əziyyət çəkir. Tədqiqatın nəticələri ABŞ Nevrologiya Akademiyasının San–Diyeqoda keçirilən 58-ci illik konfransda təqdim olunmuşdur.

PİYLƏNMƏ ALTSHEYMER XƏSTƏLİYİNƏ SƏBƏB OLA BİLƏR

MÜƏLLİFLƏ ƏLAQƏ

Bölmənin digər xəbərləri