REGİONLAR
Polis orqanları seçkilər zamanı asayişin təmin edilməsində mühüm rol oynayırlar
Şirvan, 29 yanvar, Mahir Babayev, AZƏRTAC
Yanvarın 29-da Şirvan Şəhər Polis Şöbəsində 2020-ci il fevralın 9-na təyin edilmiş Azərbaycan Respublikası Milli Məclisinə seçkilərdə polisin xidməti fəaliyyətinin daha da təkmilləşdirilməsinə həsr olunmuş regional seminar-müşavirə keçirilib.
Mərkəzi Seçki Komissiyası (MSK) və Daxili İşlər Nazirliyinin birgə təşkilatçılığı ilə keçirilən tədbirdə MSK-nın üzvləri İlham Məmmədov, Bəxşeyiş Əsgərov, Daxili İşlər Nazirliyinin Baş İctimai Təhlükəsizlik İdarəsinin nümayəndəsi Hamlet Hümbətəliyev, Şirvan Şəhər Polis Şöbəsinin rəisi Hikmət Quliyev, 28 seçki dairəsi dairə seçki komissiyalarının sədrləri və 17 şəhər və rayon polis orqanlarının nümayəndələri iştirak edib.
AZƏRTAC-ın bölgə müxbiri xəbər verir ki, Şirvan Şəhər Polis Şöbəsinin rəisi Hikmət Quliyev çıxış edərək seçki subyektləri, onların hüquq və vəzifələri, qanunsuz müdaxilənin yol verilməməsi ilə bağlı fikirlərini bölüşüb, Milli Məclisə seçkilərin təhlükəsiz şəraitdə keçirilməsi ilə bağlı şəhər polis şöbəsində görülən işlərdən danışıb.
Mərkəzi Seçki Komissiyasının üzvü İlham Məmmədov “Seçki qanunvericiliyi, seçki komissiyalarının sistemi, seçki prosesi, onun mərhələləri və müddətləri. Seçki komissiyaları və polis orqanlarının birgə fəaliyyətinin əsasları” mövzusunda çıxış edərək bildirib ki, tədbirin keçirilməsində əsas məqsəd seçki qanunvericiliyinin və səsvermə günü polisin üzərinə düşən vəzifələrin və ictimai qaydaların qorunmasının izah edilməsidir.
Qeyd olunub ki, polis orqanları seçki prosesində bilavasitə iştirak etməsələr də, onlar yerlərdə seçki mühitinin yaranmasında, seçkilər zamanı asayişin təmin edilməsində mühüm rol oynayırlar.
Diqqətə çatdırılıb ki, Azərbaycan seçkilərin keçirilməsi sahəsində kifayət qədər böyük təcrübə qazanıb. Bu təcrübə imkan verir ki, qarşıdan gələn Milli Məclisə seçkilər də yüksək səviyyədə keçirilsin. Azərbaycan hakimiyyətinin siyasi iradəsi və bu sahədə görülən zəruri tədbirlər ölkəmizdə Milli Məclisə seçkilərin azad, demokratik, şəffaf, milli qanunvericiliyə və beynəlxalq standartlara uyğun şəkildə keçirilməsinə şərait yaradır.
Daxili İşlər Nazirliyi Baş İctimai Təhlükəsizlik İdarəsinin nümayəndəsi Hamlet Hümbətəliyev “Seçki kampaniyası dövründə və seçkilərin keçirildiyi gün ictimai qaydanın təmin edilməsi ilə bağlı polis əməkdaşlarının hüquq və vəzifələri. Seçkidən sonrakı dövrdə seçki bülletenlərin və digər seçki sənədlərinin dairə və Mərkəzi Seçki Komissiyasına gətirilməsi zamanı təhlükəsizlik tədbirlərinin görülməsi” mövzusunda çıxış edərək bildirib ki, fevralın 9-na təyin edilmiş Milli Məclisə seçkilərin qanunvericiliyin tələblərinə uyğun, təhlükəsiz və demokratik şəraitdə keçirilməsində polis əməkdaşlarının üzərinə mühüm vəzifələr düşür. Seçkilərlə əlaqədar asayişin mühafizəsi və ictimai təhlükəsizliyin təmin olunması ilə bağlı Daxili işlər Nazirliyinin rəhbərliyi tərəfindən xüsusi tədbirlər planlı təsdiq edilib və icrası nəzarətə götürülüb.
Diqqətə çatdırılıb ki, Daxili İşlər Nazirliyinin bütün orqan və nizami polis hissələri seçki ərəfəsi və seçki günü gücləndirilmiş iş rejimində fəaliyyət göstərəcək.
MSK üzvü Bəxşeyiş Əsgərov “Seçki subyektləri, onların hüquq və vəzifələri. Seçki subyektlərinin fəaliyyətinə qanunsuz müdaxilənin yolverilməzliyi” mövzusunda təqdimatla çıxış edib.
Seminar-müşavirədə mövzu ilə bağlı geniş müzakirələr aparılıb.