Politoloq: Azərbaycan ilə Rusiya arasında illərin sınağından çıxan dostluq əlaqələri mövcuddur
Bakı, 12 may, Səadət Hakıyeva, AZƏRTAC
İrqçilik siyasəti yürüdən ölkələr çox təhlükəlidir və tarixboyu bəşəriyyət üçün qorxu yaradıblar. Başqasının torpaqlarına göz dikən və onu zəbt edən ölkə humanist dəyərlərə deyil, qara qüvvələrə xidmət edir. Dünya təcrübəsindən də göründüyü kimi, başqasının torpağına göz dikən ölkələrin təcavüzkar siyasətinin qarşısı alınmayanda fəsadları ağır olur. Onların gözü doymur və daha çoxunu istəyirlər. Hazırda belə ölkələrdən biri də Ermənistandır. İşğalçı Ermənistan Azərbaycan torpaqlarını mənimsəməklə qane olmur və daha çoxunu istəyir. Onun fikrindən Türkiyənin, Gürcüstanın torpaqlarına sahib olmaq istəyi də keçir. Bu harınlığın, özbaşınalığın səbəbi dünya ictimaiyyətinin vaxtında təcavüzkar ölkənin siyasətinə münasibət bildirməməsidir.
Bu sözləri AZƏRTAC-a açıqlamasında politoloq İlqar Vəlizadə söyləyib.
Politoloq deyib ki, Adolf Hitler vaxtilə Avstriya və Çexoslovakiyanı işğal etdikdən sonra Münxendə hərəkətinə cavab verilməyəndə digər ölkələri də zəbt etməyə girişdi. Hazırda işğalçı Ermənistan da həmin siyasəti yürüdür. Bu ölkə Dağlıq Qarabağ bölgəsini və ətraf rayonları zəbt etməklə 30 ildir ki, Azərbaycan torpaqlarını işğal altında saxlayır. Təəssüf ki, gözü doymayan işğalçı Ermənistan ona tutarlı cavab verilmədiyi üçün daha çoxunu istəyir. Bu ölkənin vandalizm siyasətinin qarşısı alınmalı və tez bir zamanda yerində oturdulmalıdır. Azərbaycan Prezidenti İlham Əliyevin Rusiyanın nüfuzlu nəşri olan “Natsionalnaya oborona” jurnalına verdiyi müsahibəsində vurğuladığı kimi, həm tarixi ədalət, həm də beynəlxalq hüquq baxımından Dağlıq Qarabağ Azərbaycanın ayrılmaz tərkib hissəsidir.
İ.Vəlizadə Azərbaycanın ordu quruculuğunda böyük uğurlar qazandığını diqqətə çatdırıb. Bildirib ki, ölkənin Silahlı Qüvvələri ən müasir silahlar və hərbi texnika ilə təchiz edilib. Təsadüfi deyil ki, “Global Firepower-2019”un hesabatına görə, Azərbaycan dünyanın ən güclü ordularının reytinqində 52-ci yerdə qərarlaşıb. O, dövlətin hərbi qulluqçuların sosial məsələlərini də diqqətdə saxladığını qeyd edərək bildirib ki, orduda 20 il qüsursuz xidmət etmiş hərbçilər dövlət hesabına pulsuz mənzillərlə təmin edilir.
Politoloq bu gün strateji tərəfdaşlığa əsaslanan Azərbaycan-Rusiya ikitərəfli dostluq münasibətlərinə də toxunub: “Azərbaycan hər zaman şimal qonşumuz Rusiya ilə əməkdaşlığa mühüm önəm verir. Ölkələrimiz arasında illərin sınağından çıxan dostluq əlaqələri mövcuddur. Hazırda tərəflər ticarət, nəqliyyat, energetika, humanitar sahə, turizmi, innovasiyalar və gənclər siyasətini əhatə edən beş yol xəritəsi çərçivəsində əməkdaşlığı davam etdirirlər. 2019-cu ildə ölkələrimiz arasında əmtəə dövriyyəsi 20 faiz artıb və 3 milyard dollardan çox olub. Proqnozlar regionda mühüm nəqliyyat arteriyası kimi Şimal-Cənub dəhlizinə ehtiyac daha da artacağını deməyə əsas verir. Rusiya ilə Azərbaycan arasında hərbi-texniki əməkdaşlıq əlaqələri də inkişaf edir. Rusiya dəfələrlə özünü etibarlı tərəfdaş kimi təsdiq edən Azərbaycanla əməkdaşlıqda maraqlı olduğunu diqqətə çatdırıb və Ermənistan bundan çox narahatdır”.
O vurğulayıb ki, Azərbaycan nəinki Rusiya, digər ölkələrlə də münasibətlərdə stabil siyasət yürüdərək özünü etibarlı tərəfdaş kimi göstərir. Bunu ölkəmizin OPEC+ formatında fəal iştirakı da sübut edir. Azərbaycan Prezidentinin də qeyd etdiyi kimi, hər bir ölkənin enerji təhlükəsizliyi onun milli təhlükəsizliyinin ayrılmaz tərkib hissəsidir. Təsadüfi deyil ki, yüksək inkişaf yolu keçən Azərbaycan əvvəl elektrik enerjisini və təbii qazı idxal etdiyi halda, indi onların ixracatçısına çevrilib. Davos Dünya İqtisadi Forumunun reytinqində elektrik enerjisinin əlçatanlıq əmsalına görə Azərbaycan dünyada ikinci yeri tutur. Bu, yüksək nailiyyətdir və inanırıq ki, ölkəmizin inkişafının qarşısını heç bir qüvvə ala bilməyəcək.
Bölmənin digər xəbərləri
