Politoloqlar: Gürcüstana qaçqın axını olmayacaq
Tbilisi, 17 iyun, AZƏRTAC
Bu gün Yaxın Şərq regionunda baş verən proseslər Gürcüstan ictimaiyyətini də narahat edən məsələlərdən biridir. İndi cəmiyyəti bir sual düşündürür - Gürcüstana qaçqın axını olacaqmı?
AZƏRTAC-ın xüsusi müxbiri mövzu ilə əlaqədar gürcü politoloqların fikirlərini öyrənib. Analitik Petre Mamradze deyib ki, hazırda Gürcüstanda İsraildən gələnlər var. Lakin, onlar müvəqqəti olaraq İsraildən gəliblər. Onun sözlərinə görə, İrandan kütləvi qaçqın axınının Gürcüstana çatması ehtimalı azdır: “Bizim gürcü yəhudilərimiz dostlarının və qohumlarının yanında qalmaq üçün müvəqqəti olaraq İsraildən gəliblər, lakin onlar yenidən qayıdacaqlar. İrana gəlincə, bizim İranla ümumi sərhədimiz yoxdur və bu cür qaçqın axınının İrandan Gürcüstana daxil olması gözlənilmir”.
Politoloq hesab edir ki, Gürcüstan hökuməti qadınların və uşaqların Beynəlxalq Qızıl Xaç Komitəsinin və BMT-nin Qaçqınlar üzrə Agentliyinin himayəsi altında köçürülməsinə ehtiyac yaranarsa, beynəlxalq qaydalara əməl edəcək: “Gürcüstanda müəyyən sayda İran vətəndaşı yaşayır, onlar doğrudan da mühacirdirlər və onların qohumları da onlara gələ bilər, bu başqa məsələdir, amma mən axın gözləmirəm”.
“Mən daha az qaçqın axını gözləyirəm, çünki İsrail indiyə qədər etdiyi hədəfli zərbələrlə kifayətlənəcək və quru əməliyyatı keçirməyəcək. İnsanların yerdəyişməsi və atıcı silahların axını genişmiqyaslı quru əməliyyatı başlayanda, cəbhə xətti yarananda və insanlar evlərini tərk etmək məcburiyyətində qalanda özünü göstərir”- deyə politoloq vurğulayıb.
Gürcüstan Strateji Təhlil Mərkəzinin geosiyasi araşdırmalar şöbəsinin rəhbəri Vaxtanq Maisaia da hələlik böyük qaçqın axını gözləmir, lakin hesab edir ki, vəziyyət pisləşərsə, insanlar sərhədlərə axışacaq və ilk növbədə İranın quru qonşularına çatacaq.
Onun sözlərinə görə, İranın siyasi rəhbərliyi artıq Rusiyadan sığınacaq istəməyə və ya heç olmasa ailə üzvlərini göndərməyə hazırlaşmağa başlayıb. İran vətəndaşlarının qaçqın axınına gəlincə, burada bir neçə variant var, onlar Türkiyəyə, Azərbaycana və ya Ermənistana gedə bilər. Onların kütləvi şəkildə hansı istiqaməti seçəcəkləri isə hələlik məlum deyil: “İndiyə qədər vəziyyət və tendensiya belədir ki, onlar getsələr, ya dağlara sığınırlar, ya da şəhərdən kənara çıxıb ailələrini də özləri ilə aparırlar. Kütləvi axın o zaman yaranır ki, insanlar sərhəddə kütləvi şəkildə toqquşsunlar, indiki mərhələdə belə bir hal müşahidə edilməyib, çünki tərəflər mülki əhaliyə hücumdan yayınır. Lakin müharibə elə bir mərhələyə keçib ki, təhlükə getdikcə daha da artır, bu, mərhələli müharibə forması ala bilər”.
Politoloq deyib ki, artıq ittifaqlar yarana bilər: “Məndə olan məlumata görə, Pakistan artıq İrana silah tədarük etməyə başlayıb və ona birbaşa dəstək verib. Türkiyə də mövqeyini ifadə edib, hətta Səudiyyə Ərəbistanı da İsrailin hava hücumlarını pisləyib. Heç bir tərəf geri çəkilmir və bu, müharibənin uzanacağından, bu halda qaçqın axınının arta biləcəyindən xəbər verir".
Vaxtanq Maisaia deyib: “İranla hava əlaqəsi bağlanıb və bu istiqamətdən giriş çətindir. Ona görə də quru variantı hələ də mümkündür, əgər axın yaranarsa və bu axın əvvəlcə Azərbaycandan keçib Ermənistana daxil olarsa, sonra da yəqin ki, bizə çatacaqlar. Biz hələlik prioritet variant deyilik”.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
