DÜNYA
Prezident Mun Ce-in: Cənubi Koreya-ABŞ-KXDR üçtərəfli sammiti keçirilə bilər
Bakı, 21 mart, AZƏRTAC
Cənubi Koreya prezidenti Mun Ce-in Koreya Xalq Demokratik Respublikası (KXDR) və ABŞ ilə birgə üçtərəfli sammitin keçirilməsinin mümkün olduğunu deyib.
AZƏRTAC Yonhap agentliyinə istinadla xəbər verir ki, prezident Mun Ce-in bu fikri ölkəsinin KXDR ilə keçiriləcək sammitə hazırlıq komissiyasının iclasında deyib. İki Koreya liderlərinin, daha sonra isə KXDR lideri Kim Çen In ilə ABŞ prezidenti Donald Trampın görüşünün tarixi hadisə olacağını qeyd edən Mun Ce-in, bu görüşlərin nəticələrinə əsasən üçtərəfli sammitin keçirilə biləcəyini bildirib.
“Biz Koreya yarımadasında nüvə silahsızlaşdırılması məsələsini tamamilə həll etməli, qarşıdakı danışıqlar və ondan sonra atılacaq addımlar vasitəsilə sülh yaratmalıyıq”, - deyə Cənubi Koreya prezidenti əlavə edib. Dövlət başçısı bildirib ki, yarımadanın nüvə silahsızlaşdırılması məsələsi iki Koreya arasında razılaşma yolu ilə həllini tapmalıdır. Bu işdə Birləşmiş Ştatların zəmanətinə də ehtiyac var.
Qeyd edək ki, aprelin sonunda Koreya Respublikası prezidenti Mun Ce-inin KXDR lideri Kim Çen In ilə, may ayında isə KXDR və ABŞ liderlərinin görüşləri planlaşdırılıb.