Bakı, 6 aprel, AZƏRTAC

Azərbaycan Prezidenti, Ali Baş Komandan İlham Əliyevin poçtuna hər gün yüzlərlə məktub və müraciət daxil olur. Ən səmimi hisslərini, istəklərini dilə gətirən sadə insanlar Prezidentlə həmrəy olduqlarını, ona inandıqlarını, torpaqlarımızın işğaldan azad edilməsinə yönəlmiş siyasətini qətiyyətlə dəstəklədiklərini yazırlar. Türkiyə, Rusiya, İsrail, Almaniya, Kanada... Coğrafiyası olduqca geniş olan bu məktub və müraciətlərdən belə bir məntiqi nəticə ortaya çıxır: Bizim milli birlik və həmrəyliyimiz qarşısında heç bir düşmən tab gətirə bilməz.

AZƏRTAC Prezidentin saytına istinadla Azərbaycandan, eləcə də yaxın-uzaq ölkələrdən Prezident və Ali Baş Komandan İlham Əliyevə ünvanlanan bir sıra məktub və müraciətləri təqdim edir.

Bizim birlik və həmrəyliyimiz qarşısında heç bir düşmən tab gətirə bilməz

“Müzəffər Azərbaycan Ordusunun erməni silahlı birləşmələrinə qarşı apardığı əməliyyatlarda qazandığı zəfərin qürur və sevincini bizə yaşatdığınız üçün Sizə minnətdaram”.

Bu sətirlər Türkiyə vətəndaşı Barbaros Erduranın Azərbaycan Prezidenti, Ali baş Komandan İlham Əliyevə ünvanlandığı məktubdan götürülüb. Milli Ordumuzun düşmənlə son döyüşlərdə göstərdiyi rəşadətdən və qazandığı qələbədən vəcdə gələn türkiyəli gənc arzularını da dilə gətirərək yazır:

“Qəlbim sizinlədir. Azərbaycan Ordusunun yeni qələbələrinin sorağını eşitmək arzusundayam. Allahdan arzum budur ki, Azərbaycan Silahlı Qüvvələri tezliklə düşməni darmadağın edərək işğal altındakı torpaqları geri qaytarsın. Möhtərəm Prezident, ehtiyac yaranarsa, mən də bir əsgəriniz kimi, ortaq Vətənimizin ərazi bütövlüyü uğrunda döyüşməyi özümə şərəf bilərəm”.

Sivasdan Halis Ərdoğan da öz müraciətində Azərbaycana, onun Prezidentinə olan sevgi və inamını, dəstəyini ifadə edir. Deyir ki, hər zaman ürəyi Azərbaycanın yanındadır: “Cəbhədə olan qardaşlarıma qoşularaq, Azərbaycanın ərazi bütövlüyü uğrunda döyüşmək üçün əmrinizi gözləyirəm. Bunu tam səmimiyyətimlə yazıram. Biz Sizi çox sevir, Sizə inanırıq. Allah köməyiniz olsun”.

Bir millət, iki dövlət olan Azərbaycan və Türkiyənin həmrəyliyi, mənəvi birliyi qardaş ölkədən sadə insanların Prezidentimizə ünvanladıqları çoxsaylı məktubların ana xəttini təşkil edir. Onları həyəcansız oxumaq mümkün deyil. Görün Çorum şəhərinin sakini İsmail Akgöz nə yazır: “Mən Türkiyənin Çorum vilayətində yaşayan və hərbi xidmətimi atıcı olaraq keçmiş bir qardaşınızam. İşğalçı Ermənistan əsgərlərini Azərbaycan ərazilərindən vurub çıxarmaq üçün mən də Qarabağ döyüşlərində azərbaycanlı qardaşlarımla çiyin-çiyinə vuruşmaq arzusundayam. Mənin 43 yaşım, iki oğlum var. Onları da vətənlərini sevən bir şəxsiyyət kimi böyütməyə çalışıram. İnanın ki, hər hansı bir döyüşdə, gözüm heç arxada qalmadan azərbaycanlı qardaşlarımızla birlikdə və Sizin əmrinizlə düşmənlə vuruşmağa hazıram. Sizi əmin edirəm ki, müqəddəs Vətən torpağının işğaldan azad edilməsi üçün Türkiyədən Azərbaycana gəlib son damla qanınadək vuruşmağa can atan mənim kimi milyonlarla qardaşınız var. Allah babalarımızın torpağı can Azərbaycanın köməyi olsun”.

Eyni səmimi fikir və istəklər, dəstək və həmrəylik duyğular digər türk qardaşımız Barış Aydının məktubunda da yer alır.

Cənab Ali Baş Komandan, Sizin əmrinizə müntəzirik

Prezidentin poçtuna Azərbaycanın hər guşəsindən məktub və müraciətlər daxil olur. Onların hamısında dövlətimizin başçısına dərin inam və sevgi, Vətənə məhəbbət hissləri əksini tapır. Məktub müəllifləri hamılıqla Ali Baş Komandan İlham Əliyevlə fəxr ediklərini, onun hər bir əmrinə müntəzir olduqlarını yazırlar.

Anar Naibov (Naxçıvan sakini): “Qüdrətli Ordumuzun düşmənə vurduğu sarsıdıcı zərbələrdən qürur hissi keçiririk. Biz özümüz cəbhədə olmasaq da, ürəyimiz oradadır. Vətənimizin ərazi bütövlüyünün bərpası uğrunda vuruşmaq üçün Sizin əmrinizi gözləyirik”.

Tural Mehdiyev (Kəlbəcər sakini): “Ordumuzun göstərdiyi qəhrəmanlıq mənə qürur verir. Lakin həm Azərbaycan vətəndaşı, həm də Kəlbəcərdə doğulmuş və yurd həsrəti ilə yaşayan bir gənc kimi hadisələri kənardan izləmək mənə çətindir. Kəlbəcər gənci olaraq torpaqlarımızın azadlığı uğrunda döyüşmək bizə şərəf verər. Bildirmək istəyirəm ki, mən Vətən uğrunda döyüşə atılmağa hazıram. Cənab Ali Baş Komandan, Sizin əmrinizi səbirsizliklə gözləyirəm”.

Yaşar Vəliyev (Ağdam rayonu): “Mən Ağdam rayonu 36 saylı məktəbin 11-ci sinif şagirdiyəm. Erməni təxribatlarının daim şahidi olmuşuq və mənfur düşmən indi də bu əməllərini davam etdirir. Son günlər Milli Ordumuzun erməni təxribatlarına tutarlı cavab verməsi hamımızı qürurlandırdı. Biz bu uğurlara ürəkdən sevinirik. İnanırıq ki, yaxın vaxtlarda işğal altındakı bütün rayonlarımız Sizin rəhbərliyiniz və qətiyyətinizlə azad ediləcək. Biz Prezidentimizlə fəxr edirik. Vətənimiz uğurunda döyüşməyə hər an hazırıq. Biz Vətənimizin və Sizin müsəlləh əsgərinizik”.

İbrahimxəlil Hüseynov (Goranboy rayonu): “Mən birinci Qarabağ müharibəsində sonadək iştirak etmişəm. İki dəfə ağır yaralanmışam, ikinci qrup müharibə əliliyəm. Cənab Prezident, Sizin cəsarətli və qətiyyətli çıxışınız hamı kimi məni də qürurlandırdı. Yenidən döyüşlərdə iştirak etmək istəyir, bunu özüm üçün böyük şərəf sayıram”.

Elnur Hüseynov (Laçın rayonu): “Bildirmək istəyirəm ki, mən və mənim kimi yüzlərlə gənc Sizin səfərbərlik əmrinizi gözləyirik. Bir laçınlı olaraq mən də cəbhə xəttinə getmək və düşmənə qarşı vuruşmaq istəyirəm. Xalqımız Sizi dəstəkləyir. Son nəfəsimizə kimi əmrlərinizi yerinə yetirməyə hazırıq, yetər ki, əmr verin. İnşallah sizin komandanlığınızla bayrağımız bütün Qarabağda dalğalanacaq”.

Xaricdə yaşasaq da, ürəyimiz Vətənlə döyünür

Xarici ölkələrdə yaşayan soydaşlarımız da Prezidentə çoxsaylı məktub və müraciətlər ünvanlayırlar. Onlar bildirirlər ki, Vətəndən uzaqda olsalar da, ürəkləri Azərbaycandadır. Azərbaycan-Slavyan Gənclər Assosiasiyası Rusiya Nümayəndəliyinin üzvləri yazırlar: Cənab Ali Baş Komandan, ulu öndər Heydər Əliyevin əsasını qoyduğu və Sizin uğurla davam etdirdiyiniz diaspor siyasətinin nəticəsidir ki, Rusiyada və ümumiyyətlə xaricdə yaşayan yüz minlərlə azərbaycanlı Dağlıq Qarabağın işğaldan azad olunması istiqamətində səylərinizi dəstəkləyir. Torpaqlarımızın geri qaytarılması hamımızın müqəddəs borcudur. Bu işdə hər zaman Sizin yanınızdayıq. Əmin ola bilərsiniz ki, Azərbaycandan kənarda yaşamalarına baxmayaraq, böyük bir diaspor ordusu Ali Baş Komandanımızın əmrini gözləyir”.

Sankt-Peterburqda yaşayan həmyerlimiz Cavid Nəsirli Milli Ordumuzun son döyüşlərdə qazandığı uğurlar münasibətilə Prezidentimizi və xalqımızı təbrik edərək yazır: “Mən Qarabağ döyüşlərinin hər anını izləyir və ordumuza dua edirəm. Sankt-Peterburqda yaşayan həmvətənlərim adından bildirmək istəyirəm ki, Vətənimiz, bayrağımız üçün son damla qanımıza qədər vuruşmağa hazırıq. Düşmən bizim birliyimizin, həmrəyliyin qarşısında dayana bilməz”.

Rusiyanın Novokuznetsk şəhərində yaşayan soydaşımız Anar Əzimov da Ali Baş Komandanın əmrinizi gözlədiyini, işğalçılarla döyüşə atılmağa hazır olduğunu bildirir. Anar əminliklə yazır ki, şəhid qardaşlarımızın qanı yerdə qalmayacaq, torpaqlarımız erməni işğalından azad ediləcək.

Prezidentin poçtuna digər bir məktub Almaniyanın Lauingen şəhərindən daxil olub. Qarabağ uğrunda döyüşlərdə iştirak etmək istədiyini bildirən soydaşımız Fərrux Zeynalov Ali Baş Komandan İlham Əliyevə müraciətlə yazır: “Sizin qətiyyətiniz və mərdliyiniz bizə ruh verir. Hərbi xidmətimi 2010-cu ildə xüsusi təyinatlı batalyonda başa vurmuşam. Əgər lazım olarsa, Sizin komandanlığınız altında döyüşə qatılmağa hazıram. Allah Sizi qorusun. Sizin bir əmriniz yetər ki, gənclər silaha sarılsın”.

“Mən İsraildə yaşasam da, bir azərbaycanlı olaraq Vətəni qorumağı, Dağlıq Qarabağımız uğrunda döyüşməyi özümə borc bilirəm. Möhtərəm Prezident, inanırıq ki, Sizin rəhbərliyinizlə ölkəmiz bu müharibədən qalib kimi çıxacaq və bayrağımız daim yüksəklərdə dalğalanacaq. Allah Sizi və xalqımızı qorusun”.

Bu sətirləri isə İsraildə yaşayan soydaşımız Eyyub Eyyubov yazır.

X X X

Prezidentə məktub və müraciət ünvanlayanlar arasında Şəkidən Sədrəddin Məmmədov, Gəncədən Vüsal Hüseynov, Laçından Elnur Hüseynov, Göygöldən Elvin Abbasov, Sumqayıtdan Lalə Qasımova, Lənkərandan Rövşən Abdulov, Lerikdən Bəhruz Rzayev, Qubadlıdan Həmid Həmidli, Kəlbəcərdən Rahim Muradxanlı, Qobustandan Şair Əhmədov, həmçinin Türkiyə vətəndaşları - Ankaradan Nalan Ongun, Əli İlhan Özdemir, Yalovadan Metr Hasan Özoğuz, Uşakdan Barış Aydan, İstanbuldan Mehmet Balioğlu, Kurtuluş Can Şahin, Mersindən Vahid Volkan, İzmirdən Yücel Yüceldağ, Antalyadan Öndər Özdiker, Kanadada yaşayan soydaşımız Mirşakir Əzizov və yüzlərlə başqaları da var. Bu məktub və müraciətlərin hamısını Vətən məhəbbəti, Prezident və Ali Baş Komandan İlham Əliyevə, Azərbaycanın haqq işinə, ədalətin təntənəsinə, böyük qələbəyə inam hissləri birləşdirir.