Professor: Yaxın gələcəkdə Zəngəzur dəhlizinin formalaşaraq fəaliyyətə başlamasının şahidi olacağıq
Bakı, 5 avqust, AZƏRTAC
ABŞ Dövlət Departamentinin "Beynəlxalq Sülh və Rifah Naminə Tramp Marşrutu"nun (TRIPP) reallaşması üçün 200 milyon dollardan ibarət xüsusi fond yaratması onu deməyə əsas verir ki, Zəngəzur dəhlizi çox yaxın gələcəkdə həyata vəsiqə alacaq. Artıq Ermənistanda da danışıqlar aparılır, avtomobil və dəmir yollarının çəkilişi istiqamətində layihələr nəzərdən keçirilir”.
Bu sözləri AZƏRTAC-a açıqlamasında professor Çingiz Axundov deyib.
O bildirib ki, dəhliz ilk növbədə Naxçıvan Muxtar Respublikasının Azərbaycan ilə nəqliyyat əlaqəsini təmin edəcək və bunun da mühüm geosiyasi əhəmiyyəti var. Naxçıvan uzun illərin blokadasından çıxaraq nəinki Azərbaycana, eləcə də dünya iqtisadiyyatına inteqrasiya olunmaq imkanı qazanacaq. Azərbaycanın iqtisadi imkanları öz ərazisində nəzərdə tutulan işləri yekunlaşdırmaq imkanı verir. Əhmədbəyli-Horadiz-Mincivan-Ağbənd avtomobil yolu, Araz çayı üzərində Ağbənd-Kəlalə körpüsünün inşası yekunlaşmaq üzrədir. Bu istiqamətdə həyata keçirilən işlərin 95 faizi tamamlanıb: “Bütün bunlar təsadüfən baş verməyib. Ötən ilin avqustunda Vaşinqtonda ABŞ, Azərbaycan və Ermənistan rəhbərləri tərəfindən imzalanan deklarasiyada nəzərdə tutulmuş işlər həyata keçirilir ki, 42 kilometrlik yol inşa edilsin”.
Professor nəzərə çatdırıb ki, ABŞ-nin Ermənistana yardımını təbii qəbul etmək lazımdır: “Zəif iqtisadiyyata malik olan Ermənistan yardım almadan üzərinə düşən işləri yerinə yetirə bilməz. Zəngəzur dəhlizi həm Azərbaycan və qonşu dövlətlər, həm də daha böyük coğrafiya üçün strateji layihə hesab edilir. Bu yol tranzit marşrutu qısaltmaqla şərqdən qərbə yükdaşıma xərclərini azaldacaq. Elə buna görə də layihənin icrası zamanı perspektivlər nəzərə alınıb”.
O vurğulayıb ki, ABŞ-nin Mərkəzi Asiya respublikaları ilə son illər müşahidə olunan yaxın iqtisadi əməkdaşlıq əlaqələri təsadüfi xarakter daşımır. Bu əlaqələrin arxasında ABŞ-nin iqtisadi maraqları dayanır: “Bildiyimiz kimi, dünya təmiz enerjiyə transformasiya olunur. Yeni texnologiyaların inkişafı üçün nadir yer metalların istifadəsi zəruridir. Bunlardan elektrikli nəqliyyat vasitələrinin, smartfonların, külək turbinlərinin, Günəş batareyalarının, hərbi texnikanın və müxtəlif texniki avadanlıqların istehsalında istifadə olunur. Mərkəzi Asiya respublikalarında uran, litium, tulium, serium və digər nadir yer metallarının qaynaqları var. Texnoloji cəhətdən inkişaf etmiş ABŞ gələcəkdə də hegemonluğunu qoruyub saxlamaq üçün bunlara ehtiyac duyur. Bu baxımdan Zəngəzur dəhlizinin fəaliyyəti təmin olunacaq. ABŞ həm sərmayə yatıracaq, həm də dəhlizin təhlükəsizliyini təmin edəcək”.
“Azərbaycan Prezidentinin irəli sürdüyü Zəngəzur dəhlizi ideyası qlobal xarakter daşıyan beynəlxalq layihədir. Bu layihənin əhəmiyyətini dünya birliyinə açıqlayan Prezident İlham Əliyev dəhlizin həyata keçirilməsinə nail olmaqla təkcə Azərbaycanı deyil, bütün region dövlətlərinin iqtisadi inkişafına təkan vermiş oldu. Odur ki, bəzi narazı tərəflərin etirazları əsassız olmaqla yanaşı, həm də obyektiv xarakter daşımır. Çox yaxın gələcəkdə dəhlizin formalaşaraq fəaliyyətə başlamasının şahidi olacağıq”, - deyə professor əlavə edib.
Bölmənin digər xəbərləri
