QADIN SAHİBKARLARIN MİLLİ ASSOSİASİYASI YARADILMIŞDIR
Ailə, Qadın və Uşaq Problemləri üzrə Dövlət Komitəsinin sədri Hicran Hüseynova ölkədə sahibkarlığın inkişafına yaradılan şəraitdən danışmış, son illərdə qadınların sahibkarlıq etdiyi müəssisələrin sayının artdığını diqqətə çarpdırmışdır. O, əldə edilmiş nailiyyətlərə baxmayaraq, qadınların sahibkarlıq fəaliyyəti ilə bağlı bəzi maneələrin olduğunu söyləmiş, onların aradan qaldırılacağına və yeni imkanların yaradılacağına əminliyini bildirmişdir.
H.Hüseynova 2006-2015-ci illər üçün hazırlanan Yoxsulluğun Azaldılması və Davamlı İnkişaf üzrə Dövlət Proqramında qadınların sahibkarlıq fəaliyyəti ilə məşğul olmaları üçün müxtəlif tədbir və proqramların həyata keçirilməsinin nəzərdə tutulduğunu açıqlamışdır.
Azərbaycan Qadın Sahibkarlarının Milli Assosiasiyasının prezidenti Vəfa Əfəndiyeva bu qurumun qarşısında duran məqsəd və vəzifələrdən danışmışdır. O, qadın sahibkarların maarifləndirilməsinə, hüquqlarının qorunmasına, onların ictimai fəallığının gücləndirilməsinə ehtiyac olduğunu söyləmişdir.
Tədbirdə bu il Koreya Respublikasının paytaxtı Seulda keçiriləcək Dünya Qadın Sahibkarları Assosiasiyasının illik konfransında Azərbaycan Qadın Sahibkarları Milli Assosiasiyasına müşahidəçi statusunun veriləcəyi bildirilmişdir.
Milli Məclisin deputatları Məlahət Həsənova, Qənirə Paşayeva, iqtisadi inkişaf nazirinin müavini Niyazi Səfərov və digər rəsmi qonaqlar Assosiasiyaya fəaliyyətində uğurlar arzulamışlar.
Bölmənin digər xəbərləri
