QAFQAZ ÇAYÇILIQ ASSOSİASİYASI TƏSİS EDİLMİŞDİR
İyulun 12-də “Biznes və İnkişafın Qafqaz Şəbəkəsi” beynəlxalq təşkilatının Azərbaycanda İxracın və İnvestisiyaların Təşviqi Fondunun (AZPROMO) dəstəyi ilə keçirdiyi Qafqaz çayçılarının birinci konqresi başa çatmışdır.
Tədbirdə Qafqaz Çayçılıq Assosiasiyası təsis edilmiş və Azərbaycan Çayçılar Assosiasiyasının prezidenti Fərman Quliyev yeni qurumun rəhbəri seçilmişdir.
Fərman Quliyev AZƏRTAC-a bildirmişdir ki, tədbirin keçirilməsinin əsas məqsədi Gürcüstan, Rusiya və Azərbaycanda çayçılığın vəziyyəti ilə tanışlıq, qarşıda duran problemlər, bu problemlərə qarşı birgə mübarizə sisteminin yaradılması, çayçılığın ənənələrinin qorunması məsələləri idi. Demək lazımdır ki, keçmiş Sovet İttifaqının əsas çay bazası olmuş Gürcüstanda, eləcə də respublikamızda hazırda çayçılıqla bağlı vəziyyət qənaətbəxş deyildir. Lakin bu problemləri həll etmək, çətin vəziyyətdən çıxmaq üçün çayçı alim və mütəxəssislərimiz, lazimi qüvvəmiz vardır.
F.Quliyev konqres iştirakçılarının “Azərsun Holdinq” şirkətlər qrupunun “Sun-Tea Azərbaycan” çay qablaşdırma fabrikinin işi ilə tanış olduqlarını və qurumun prezidenti Abdolbari Goozal ilə görüşdüklərini də söyləmişdir.
Qafqaz çayçılarının ikinci konqresinin Tbilisidə keçirilməsi nəzərdə tutulmuşdur.
Qeyd edək ki, konqres çərçivəsində bu gün Bakı dəniz vağzalında müxtəlif çay növlərinin dequstasiyası da təşkil edilmişdir.
Bölmənin digər xəbərləri
