Qafqaz Universitetinin mühəndislik fakültəsinin tələbələri “Eko-park”da olmuşlar
Bakı, 29 mart (AZƏRTAC). Martın 29-da Qafqaz Universitetinin mühəndislik fakültəsinin bir qrup tələbəsi Azərbaycan Respublikası Dövlət Neft Şirkətinin (ARDNŞ) Ekologiya İdarəsinin Qala qəsəbəsində yerləşən “Ekoloji park”nda olmuşlar.
AZƏRTAC xəbər verir ki, əvvəlcə “Eko-mərkəz”də tələbələrə “ARDNŞ-in Ekoloji layihələri” mövzusunda təqdimat materialı nümayiş etdirilmiş, “Eko-park”ın yaradılma məqsədi, təyinatı, parkın istehsalat sahələri və infrastrukturu barədə ətraflı məlumat verilmiş və onlara istehsal prosesi ilə əyani tanış olmaq üçün müvafiq şərait yaradılmışdır.
Mərkəzdə Ekologiya İdarəsinin 2013-cü il üzrə iş proqramına daxil olan ekoloji maarifləndirmə tədbirləri haqqında müzakirələr aparılmış və gələcəkdə belə tədbirlərin mütəmadi davam etdirilməsi qərara alınmışdır.
Sonda tələbələr “Eko-mərkəz” və qapalı şitilxana kompleksində yerləşən toxum şöbəsində, böyütmə şöbəsində və dekorativ bitkilər üçün oranjereyada yetişdirilən eldar şamı, Şərq tuyası, Avropa zeytunu, Lənkəran akasiyası və digər növ bitkilərlə tanış olmuşlar.
Elektrik enerji təchizatının alternativ enerji mənbələri hesabına ödənilməsi məqsədi ilə parkda quraşdırılan 4 ədəd külək generatoru və günəş panellərinin iş rejimi gənclərdə maraq doğurmuşdur.
Bölmənin digər xəbərləri
