Qanunsuz ov edənlər 8 min manat cərimələndilər
Bakı, 19 aprel, AZƏRTAC
Ekologiya və Təbii Sərvətlər Nazirliyinin əməkdaşları tərəfindən “Heyvanlar aləmi haqqında” Azərbaycan Respublikası Qanununun tələblərinə riayət olunması ilə bağlı ölkə ərazisində növbəti reyd keçirilib.
Nazirliyin mətbuat xidmətindən AZƏRTAC-a bildirilib ki, Salyan rayonu ərazisində qanunsuz ov edən Hacıqabul rayonunun Qarasu kənd sakini Vurğun Məlikov, Birləşmiş Ərəb Əmirliklərinin vətəndaşları Butti Ghamin Ali Ahmed Almansoori, Mohamed Eisa Mohamed Hamdan Almansoori və Salem Sultan Salem Kltham Alkedən saxlanılıb. Onlardan 1 ov tüfəngi və 16 ədəd patron götürülüb.
Faktla bağlı təqsirkar şəxslər barəsində qanunvericiliyin tələblərinə uyğun akt və protokol tərtib edilib və İnzibati Xətalar Məcəlləsinin müvafiq maddəsinə əsasən hər biri 2 min manat olmaqla, ümumilikdə 8 min manat məbləğində cərimə edilib.
Xarici vətəndaşların ölkə ərazisindən çıxarılması və gələcəkdə Azərbaycan Respublikasına buraxılmaması ilə əlaqədar mövcud qanunvericiliyə uyğun tədbir görülməsi üçün Dövlət Miqrasiya Xidmətinə məktub göndərilib.
Bölmənin digər xəbərləri
