Qanunsuz silahlı birləşmələrin Qarabağdan çıxarılması ümumilikdə Avrasiyanın da təhlükəsizliyinə töhfə oldu- ŞƏRH
Bakı, 5 avqust, AZƏRTAC
İkinci Qarabağ müharibəsinin yekunu olaraq imzalanan 2020-ci il 10 noyabr tarixli üçtərəfli Bəyanatda Ermənistan üzərinə götürdüyü öhdəlikləri bir müddət sonra yerinə yetirməkdən boyun qaçırmağa başladı. Bəyanatın müddəalarından biri və ən əsası bölgədə sülhə, sabitliyə nail olmağın yeganə yolunun erməni silahlı qüvvələrinin tezliklə Azərbaycanın Qarabağ bölgəsindən qeyd-şərtsiz və tamamilə çıxarılması idi ki, bu da qondarma rejimin özünü buraxmasını şərtləndirəcəkdi. Lakin sənədin imzalanmasından ötən iki il ərzində isə Qarabağda üçtərəfli Bəyanatın müddəalarına zidd proseslər baş verirdi, qanunsuz erməni silahlı birləşmələri mövcudluğunu davam etdirirdi. Onlar Qarabağda hərbi təxribatlar törədir və Azərbaycan Ordusunun bölmələrinin şəxsi heyətinə qarşı silahlı hücumlar həyata keçirirdilər. Həmçinin Ermənistan ordusunun kəşfiyyat-diversiya qrupları tərəfindən avtomobil yollarında quraşdırılan minaların partlaması nəticəsində mülki şəxslər və hərbi qulluqçular həlak olur, yaxud yaralanırdılar. Bu da qanunsuz silahlı birləşmələrin tərk-silah edilərək ərazilərimizdən çıxarılmasına, onların hərbi infrastrukturlarının zərərsizləşdirilməsinə, dinc əhali, o cümlədən ərazidə aparılan bərpa-quruculuq işlərinə cəlb olunmuş mülki işçilərin, eyni zamanda, hərbi qulluqçularımızın təhlükəsizliyinin təmin olunması, ən əsası, ölkəmizin konstitusiya quruluşunun bərpası üçün bölgədə antiterror tədbirlərinə zərurət yaradırdı.
Bu sözləri AZƏRTAC-a açıqlamasında Azərbaycan Mətbuat Şurasının İdarə Heyətinin üzvü Yeganə Hacıyeva söyləyib.
O bildirib ki, Azərbaycan ərazisindəki qanunsuz erməni silahlı dəstələrinin üzvləri 2022-ci ilin avqustun 3-də Azərbaycan Ordusunun bölmələrinə qarşı terror-təxribat əməli törətməsi nəticəsində hərbi qulluqçumuz şəhid oldu. Eyni zamanda, erməni silahlı dəstələri döyüş mövqelərini gücləndirməyə və bölmələrini yüksək döyüş hazırlığı səviyyəsinə gətirməyə cəhd edirdilər. Bundan sonra “Qisas əməliyyatı” adlandırılan antiterror əməliyyatlarının keçirilməsinə zərurət yarandı. Aparılan antiterror tədbirləri çərçivəsində Ermənistan silahlı qüvvələrinin birləşmələrinin ön xətt və dərinlikdə olan mövqeləri, uzunmüddətli atəş nöqtələri, eləcə də hərbi təyinatlı obyektləri sıradan çıxarıldı, Azərbaycan Silahlı Qüvvələri bir neçə strateji yüksəklikdə möhkəmləndi. Bu, Azərbaycan Respublikasının Konstitusiyasına uyğun olaraq öz suveren ərazilərində terror və təxribatın qarşısının alınması hüququnun tərkib hissəsi idi və 2023-cü ilin sentyabrında Qarabağın bütün ərazilərində həyata keçirilən antiterror tədbirlərinə yol açdı.
“Azərbaycan Silahlı Qüvvələrinin bölmələri tərəfindən həyata keçirilən antiterror əməliyyatları 2023-cü ilin sentyabrında Azərbaycanın dövlət suverenliyinin bərpasına, Konstitusiyamızın ölkəmizin bütün ərazisində tətbiqinə imkan yaratdı. Həmçinin Mərkəzi Asiyanın enerji və mineral ehtiyatlarının şaxələndirilməsi, Xəzərin enerji resurslarının dünya bazarına sərbəst çıxışının təmin olunması, regionda birbaşa maraqları olan və yaxud bölgəni keçid kimi istifadə edən ölkələrin, xüsusilə Türkiyə, ABŞ, Avropa İttifaqı və onların müttəfiqlərinin enerji və kommunikasiya təhlükəsizliyinin gücləndirilməsi vacib şərtlərdən biri idi. Terrorçulara qarşı keçirilən tədbirlərlə ölkəmizin konstitusiya quruluşunu, bölgədə təhlükəsizliyi tam təmin etməsi həmçinin 2000-ci illərdən başlayaraq Xəzərin enerji resurslarının nəqlinin Şimal və Cənub nəqliyyat marşrutlarından asılılığını, ən əsası, zaman-zaman şantaj kimi istifadə olunmasını aradan qaldırdı”, - deyə politoloq vurğulayıb.
Y.Hacıyeva deyib ki, separatçı rejim işğal illərində və 2023-cü ilin sentyabra qədər ərazilərimizdə xeyli sayda mina basdırmış, təhlükəli yüklərin istehsalı və tranziti üçün baza formalaşdırmışdı. Torpaqlarımızın işğaldan azad olunması ilə bölgədə fəaliyyət göstərən xarici şirkətlərin ərazilərimizin iqtisadi göstəricilərinin güclənməsinə xidmət etmələri üçün təhdid ünsürləri zərərsizləşdirilməli idi. Qanunsuz silahlı birləşmələrin ərazilərimizdən çıxarılması ümumilikdə Avrasiyanın da təhlükəsizliyinə töhfə oldu. Erməni terrorçularına qarşı əməliyyatlar, həmçinin Cənubi Qafqazın və Xəzər regionunun ekoloji təhlükəsizliyi aspektindən də vacib idi. Çünki istər Qarabağda, istərsə də ətraf rayonlarda Ermənistanın məqsədli şəkildə törətdiyi vandallıqlar müəyyən resursların tükənməsinə gətirib çıxarırdı.
Onun sözlərinə görə, antiterror əməliyyatlarından sonra erməni lobbisi və onların havadarları bütün mümkün rıçaqlardan istifadə etməklə Azərbaycana qarşı kampaniyalar aparmağa başladılar. Daha əvvəldən də həyata keçirilən bu fəaliyyətlər 44 günlük Vətən müharibəsinin ilk günlərindən başlamış, 2023-cü ilin sentyabr əməliyyatlarından sonra pik həddə çatmışdı.
Erməni lobbisi və havadarları bütün beynəlxalq platformalarda dünya birliyinə Azərbaycana qarşı diplomatik, humanitar, iqtisadi və hərbi sahələrdə təzyiqlər göstərilməsinə çağırışlar edirdilər. Onu da qeyd etmək lazımdır ki, Azərbaycanın 2022-ci və 2023-cü illərdə apardığı antiterror tədbirləri müstəsna olaraq qanunsuz hərbi birləşmələri və hərbi infrastrukturu hədəf almışdı. Mülki əhali və obyektlər heç bir halda atəş hədəfi olmamışdı. Buna baxmayaraq, ermənilərin dəstəkçiləri bununla bağlı dezinformasiyalar və təhrif olunmuş məlumatlar yaymaqla, manipulyasiyalar etməklə beynəlxalq təşkilatlarda ölkəmiz əleyhinə təzyiq vasitələri qazanmağa çalışırdılar. Lakin bütün bu təşəbbüslər və səsləndirilən iddialar əsassız olduğu üçün nəticəsiz qaldı.
Bölmənin digər xəbərləri
