Ağdam, 26 mart, Tahir Ağaməmmədov, AZƏRTAC

Azərbaycan Prezidenti İlham Əliyevin tövsiyəsinə əsasən ölkəmizin tarixinin, mədəniyyətinin, adət-ənənələrinin, müstəqillik illərində əldə edilmiş nailiyyətlərin dərindən öyrənilməsi məqsədilə “Ölkəmizi tanıyaq” adı ilə keçirilən maarifləndirici tur-aksiyaya Qarabağ bölgəsinin məktəbliləri də qoşulublar. Ağdam, Ağcabədi, Bərdə və Beyləqan rayonlarından ümumilikdə, 160 nəfər məktəbli martın 26-29-da “Ölkəmizi tanıyaq” devizi altında keçiriləcək maarifləndirici tur-aksiya çərçivəsində Qəbələ, Şəki və Zaqatala rayonlarını daha yaxından tanıyacaqlar.

AZƏRTAC-ın bölgə müxbiri xəbər verir ki, Ağdam rayonunun məktəbliləri “Ölkəmizi tanıyaq” layihəsi çərçivəsində təşkil olunmuş maarifləndirici tur-aksiyasına Quzanlı qəsəbəsindən yola düşüblər. Heydər Əliyev Mərkəzinin qarşısında keçirilən yolasalma mərasimində rayon ictimaiyyətinin nümayəndələri, müəllimlər və valideynlər iştirak ediblər.

Ağdam Rayon İcra Hakimiyyəti başçısının müavini Ağa Zeynalov və təhsil şöbəsinin müdiri Mətanət Misirxanova çıxış edərək aksiyanın əhəmiyyətindən danışıb, şagirdlərə səfərlərinin olduqca maraqlı olacağını, tur-aksiyadan çox şey öyrənəcəklərini bildiriblər.

Qeyd olunub ki, ölkə iqtisadiyyatında önəmli rola malik olan bölgələrimizdən biri də Qəbələ-Şəki-Zaqatala zonasıdır. Bu rayonlarımız da digər bölgələrimiz kimi, həm turizm iqtisadiyyatı, multikulturalizm ənənələri, həm də tarixi məkanları ilə tanınır. Eyni zamanda, bu bölgədə barama, tütün və fındıqçılıq da geniş inkişaf edib.

Müəllim və valideynlər məktəblilərə səfərlə bağlı tövsiyələrini veriblər.

Övladını yola salmağa gələn valideyn Yusif Məhərrəmov tur-aksiyadan məmnunluğunu belə ifadə edib: “Hər bir valideyn kimi mənim də istəyim övladımın bilikli, dünya görüşlü olmasıdır. “Ölkəmizi tanıyaq” tur-aksiyası məktəblilərə Vətənimizi daha yaxşı tanımaq, biliklərini artırmaq imkanı verir. Tur-aksiyanın təşkilatçılarına minnətdaram”.

Bənövşələr kənd tam orta məktəbin şagirdi Emil Arifli deyib: “Şagird dostlarımla birgə Qəbələ, Şəki və Zaqatalanın təbiəti, görməli yerləri ilə tanış olacağıq. Belə layihələrin olması çox yaxşıdır. Çünki, hər bir kəs yaşadığı ölkənin tarixi, coğrafiyası, təbiəti, adət-ənənələri, mədəniyyəti barədə məlumatlı olmalıdır. Ölkəmizi tanıyaq tur aksiyası bizə bu şəraiti yaradır. Belə bir aksiyanın keçirilməsinə görə dövlətimizin başçısına minnətdarlığımı bildirirəm”.

Tur-aksiyada iştirak edəcək şagird və müşayiətçilər Heydər Əliyev Mərkəzində eksponatlarla tanış olub, Ümummilli Liderin abidəsi önünə gül dəstələri qoyub, sonra onlar üçün ayrılmış avtobusla Qəbələ-Şəki-Zaqatala istiqamətində yola düşüblər.

XXX

“Ölkəmizi tanıyaq” devizi ilə keçirilən maarifləndirici tur-aksiyaya qoşulan Bərdə rayonunun məktəbliləri də Qəbələ-Şəki-Zaqatala marşrutu üzrə ekskursiyaya başlayıblar.

Məktəblilərlə keçirilən görüşdə təhsil şöbəsinin müdiri Rzaqulu Şərifov çıxış edərək layihənin yeniyetmə və gənclərin dünyagörüşünün formalaşmasında, vətənpərvərlik tərbiyəsinin daha da yüksəldilməsində mühüm rol oynadığını vurğulayıb. Qeyd edib ki, “Ölkəmizi tanıyaq” devizi ilə təşkil olunan tur-aksiyanın məqsədi məktəblilərə ölkəmizi daha yaxından tanıtmaqdan, Azərbaycan tarixini, mədəniyyətini, ayrı-ayrı bölgələrin adət-ənənələrini dərindən öyrətməkdən və gənclərdə milli mənəvi dəyərlərə hörmət aşılamaqdan ibarətdir.

Diqqətə çatdırılıb ki, məktəbliləri 4 gün ərzində Qəbələdə “Tufandağ” Xizəkçilik Kompleksinə, qədimliyi ilə fərqlənən Çuxur Qəbələ Tarix və Mədəniyyət Qoruğuna, udilərin yaşadığı Nic kəndinə baş çəkəcəklər. Zəngin Şəki mətbəxi, Dövlət Tarix-Memarlıq Qoruğu, Şəki Xan sarayı, Yuxarı Karvansaray, Aşağı Karvansaray, Cümə məscidi və Kiş kəndindəki qədim Alban məbədi, “Marxal” müalicəvi istirahət kompleksi tur-aksiya iştirakçılarında zəngin təəssürat oyadacaq. Məktəblilər vaxtilə gülçülük, tütünçülük və fındıq bağları ilə məşhur olan Zaqatalaya da gedəcəklər. Şagirdlər müasir fındıq emalı müəssisəsi, tütünçülük təsərrüfatları ilə tanış olacaq, Tarix-Mədəniyyət Qoruğuna baş çəkəcək, Dədə Qorqud Meydanını gəzəcəklər. Qədim və müasir Zaqatala haqqında məlumatlar tur-aksiya iştirakçılarının böyük marağına səbəb olacaq.

Mərasim başa çatdıqdan sonra şagirdlər onlar üçün ayrılmış avtobusla Qəbələ-Şəki-Zaqatala marşrutu ilə yola düşüblər.

XXX

Ağcabədi şəhərində rayon icra hakimiyyətinin və təhsil şöbəsinin nümayəndələrinin, valideynlərin iştirakı ilə bu rayonun məktəblilərindən ibarət qrupun yola salınması mərasimi keçirilib.

Məktəblilərlə görüşdə Ağcabədi Rayon İcra Hakimiyyəti başçısının müavini Naibə Mustafayeva və təhsil şöbəsinin müdiri Solmaz Rəhimova çıxış edərək şagirdlərə tur-aksiyalar barədə geniş məlumat verib, onlara səfərlərinin xoş və mənalı keçməsini arzulayıblar.

Bildirilib ki, layihənin əsas məqsədi şagirdləri ölkəmizin müxtəlif bölgələrinin müasir həyatı, tarixi, mədəni irsi, adət-ənənələri, özünəməxsus xüsusiyyətləri, ümummilli lider Heydər Əliyevin qurub-yaratdığı müstəqil Azərbaycanın nailiyyətləri ilə yaxından tanış etmək, Prezident İlham Əliyevin qətiyyəti və iradəsi ilə respublikamızın dinamik sosial-iqtisadi inkişafı, gündən-günə abadlaşan şəhər və rayonlarımızın yeniləşən siması barədə gənclərdə əyani təsəvvür yaratmaqdır.

Müəllim və valideynlər məktəblilərə səfərlə bağlı tövsiyələrini veriblər. Şagirdlər ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad edib, onlar üçün ayrılmış avtobusla yola düşüblər.

XXX

“Ölkəmizi tanıyaq” maarifləndirici tur-aksiyasına qoşulan beyləqanlı məktəblilərlə görüş Heydər Əliyev Mərkəzində olub. Beyləqan Rayon İcra Hakimiyyəti başçının müavini Aytən Mirzəyeva gənclərin dünyagörüşünün daha da zənginləşdirmək, onlara Vətənimizi daha yaxından tanıtmaq məqsədilə keçirilən tur-aksiyanın əhəmiyyətindən danışıb, məktəblilərə səfərlərinin xoş və mənalı keçməsi üçün tövsiyələr verib.

Diqqətə çatdırılıb ki, Azərbaycanda həyata keçirilən dövlət gənclər siyasətinin başlıca məqsədlərindən biri gənc nəslin Vətənə məhəbbət ruhunda tərbiyə olunmasıdır. “Ölkəmizi tanıyaq” devizi ilə keçirilən maarifləndirici tur-aksiyalar da məhz bu amala xidmət edir. Azərbaycanın regionları ilə tanışlıq məktəblilərin dünyagörüşünü daha da zənginləşdirir, gənclərin vətənpərvərlik ruhunda tərbiyə olunmasında mühüm rol oynayır.

Tur-aksiyada iştirak edəcək şagird və müşayiətçilər ümummilli lider Heydər Əliyevin abidəsi önünə gül dəstələri qoyub, sonra onlar üçün ayrılmış avtobusla Qəbələ-Şəki-Zaqatala istiqaməti üzrə yola düşüblər.