QARABAĞ MÜHARİBƏSİ ƏLİLLƏRİ, VETERANLARI VƏ ŞƏHİD AİLƏLƏRİ İCTİMAİ BİRLİYİNİN II QURULTAYI KEÇİRİLMİŞDİR
Tədbir iştirakçıları, əvvəlcə, Fəxri xiyabana gedərək, xalqımızın dahi oğlu, ulu öndər Heydər Əliyevin xatirəsini yad etmiş, abidəsi önünə əklil qoymuşlar. Sonra Şəhidlər xiyabanında olan nümayəndə heyəti dövlətimizin müstəqilliyi və ərazi bütövlüyü uğrunda canlarından keçmiş Vətən övladlarının xatirəsini yad etmiş, “Əbədi məşəl” abidəsinin önünə əklil qoymuşlar.
Qurultayda Qarabağ uğrunda döyüşlərdə şəhid olanların xatirəsi bir dəqiqəlik sükutla anılmışdır. İctimai birliyin sədri Mehdi Mehdiyev çıxış edərək, ümummilli liderimiz Heydər Əliyevin xeyir-duası ilə 2001-ci ildə təsis olunmuş bu qurumun hazırda 60 minə yaxın üzvü olmasından, respublikamızın bütün şəhər və rayonlarında yerli şöbələrinin fəaliyyət göstərməsindən danışmışdır.
Prezident İlham Əliyevin yürütdüyü uğurlu siyasət nəticəsində müharibə veteranlarının, əlillərin və şəhid ailələrinin yaşayış şəraitinin ildən-ilə yaxşılaşdığını, onların mənzil probleminin aradan qaldırıldığını, eləcə də işlə təmin olunması üçün fəaliyyət sahələrinin yaradıldığını diqqətə çatdıran M.Mehdiyev rəhbərlik etdiyi qurumun dövlət və qeyri-hökumət təşkilatları ilə sıx əməkdaşlıq şəraitində səmərəli nəticələr əldə etdiyini bildirmişdir.
Natiq təşkilatın üzvləri adından ölkəmizin ayrılmaz hissəsi olan Dağlıq Qarabağın və ətraf rayonların erməni işğalından azad olunması uğrunda Ali Baş Komandan İlham Əliyevin əmrinə hər zaman hazır olduqlarını vurğulamışdır.
Sonra qurumun Mərkəzi Nəzarət-Təftiş Komissiyasının hesabatı dinlənilmiş, müzakirələr aparılmışdır. Açıq səsvermə yolu ilə Mehdi Mehdiyev yenidən növbəti 5 ilə ictimai birliyin sədri seçilmişdir.
