Bakı, 5 noyabr, AZƏRTAC

Albert Eynşteyn deyirdi, mən yalnız sülh üçün edilən müharibəni təqdir edirəm. Napoleon isə qələbənin təməlində hərbi qüvvələrin mükəmməlliyi ilə yanaşı, liderlərin qüdrətinin, xalqın ruhunun məğlubedilməzliyinin əsas olduğunu bildirirdi. İkinci Qarabağ müharibəsi Azərbaycanın yeni hərbi strategiyasının mükəmməlliyi ilə bərabər, xalq-Prezident vəhdətinin dönməzliyini, qırılmazlığını sübut etdi. Məlum olduğu kimi, hər bir dövlətin və xalqın həyatında, inkişafında ən vacib amillərdən biri ona rəhbərlik edən liderin şəxsi keyfiyyətləridir. Siyasi liderin populyarlığı və nüfuzu onun ölkə daxilində, xalq arasında qazandığı nailiyyətlərdən və xalqın ona inam və etimadından asılıdır. Həyatını Azərbaycanın müstəqilliyinə, demokratik dövlət quruculuğuna həsr edən ulu öndər Heydər Əliyev torpaqlarımızın suverenliyinin bərpası uğrunda uzunmüddətli fəaliyyətinin əsas məqsədini belə bəyan edirdi: “Bizim əsas problemimiz Ermənistanın Azərbaycana təcavüzünü aradan qaldırmaq, işğal olunmuş torpaqlarımızı azad etmək, respublikanın ərazi bütövlüyünü təmin etməkdir”.

Dahi şəxsiyyət inanırdı ki, Azərbaycan bu vəzifənin öhdəsindən uğurla gələcək, işğal olunmuş torpaqlardan erməni silahlılarını qovub çıxaracaqdır. Bu inamın təməlində Azərbaycan sevgisinə, böyük şəxsiyyətin milli-vətənpərvərlik idealına söykənən varislik prinsipi dayanırdı. Ulu Öndərin qətiyyətinin, prinsipiallığının, siyasi siqlətinin işığında formalaşmış Prezident İlham Əliyev hakimiyyətə gəldiyi ilk günlərdən sübut etdi ki, o, Ulu Öndərin və böyük dövlət xadiminin adına layiq varisidir.

Bu fikirləri AZƏRTAC-a Bakı Slavyan Universitetinin Azərbaycan multikulturalizmi və ölkəşünaslıq kafedrasının müdiri dosent İbrahim Quliyev bildirib. O qeyd edib ki, müharibədə Qələbə, ilk növbədə, dövlət başçısı ilə xalqın qarşılıqlı münasibətindən, inam və etimaddan asılıdır. Ümumiyyətlə, dövlətin başında duran şəxsin apardığı siyasət uğurla da, uğursuzluqla da nəticələnə bilər. Biz bu iki nümunəni Azərbaycanın və Ermənistanın timsalında görə bilərik: Ermənistanın ayrı-ayrı rəhbərlərinin apardıqları siyasət bu gün erməni xalqının dövlətçiliyini sual altına qoyub. Azərbaycan Respublikasının Prezidenti İlham Əliyevin başçılığı ilə aparılan siyasi xətt isə qısa müddətdə ölkəmizi nəinki regionun, hətta dünyanın sayılıb-seçilən dövlətlərindən birinə çevirmişdir. Prezident İlham Əliyevin ölkəyə rəhbərlik etdiyi 2003-cü ildən bu vaxtadək olan müddət Azərbaycan tarixinə hərtərəfli və sürətli inkişaf dövrü kimi daxil olub. Şübhəsiz ki, sosial-siyasi sabitliyin qorunması, mövcud iqtisadi inkişaf, hərtərəfli tərəqqi heç də asan başa gəlməyib. Gənc dövlətin əsaslarının möhkəmliyi və həyata keçirilən strategiyanın səmərəliliyi məhz Prezident İlham Əliyevin liderlik keyfiyyətləri, zəkası, siyasi iradəsi və uzaqgörənliyi sayəsində mümkün olmuşdur. Onun şəxsiyyəti müasir cəmiyyətdə lider obrazının, əsl dövlət başçısının ən mühüm cəhətlərini özündə birləşdirir.

Təbii ki, qloballaşma, dünyanın bir ev qismində təzahür etdiyi indiki vaxtda, xüsusilə də, ikili standartların mövcud olduğu şəraitdə müharibə elan etmək, Azərbaycanın haqlı olduğunu dünyaya sübut etmək, olduqca mürəkkəb bir məsələ idi. Lakin Azərbaycan Prezidentinin rəhbərliyi ilə ölkə diplomatiyası həm ikitərəfli münasibətlər, həm də beynəlxalq təşkilatlar və birliklər çərçivəsində Azərbaycan xalqının haqq səsini dünyaya çatdırmağı bacardı: BMT Təhlükəsizlik Şurasının qətnamələrindən sonra İslam Əməkdaşlıq Təşkilatının, Türk Dövlətləri Birliyinin Azərbaycanın ərazi bütövlüyünü dəstəkləməsi, 2018-ci ildə Azərbaycanla Avropa İttifaqı arasında imzalanan “Tərəfdaşlığın prioritetləri” adlı sənəddə, həmin ilin sonunda NATO-nun Zirvə görüşündə qəbul edilmiş Yekun Bəyannamədə Azərbaycanın ərazi bütövlüyünün öz əksini tapması mövqelərimizin güclənməsi istiqamətində mühüm addım oldu. Azərbaycan liderinin səyləri nəticəsində BMT-dən sonra dünyanın ikinci ən böyük təşkilatı sayılan Qoşulmama Hərəkatının 120-dən artıq ölkəsinin Bakı sammitində Ermənistanı işğalçı adlandırması Qarabağ yolunda rəsmi Bakının apardığı ardıcıl siyasətin uğurlu nəticəsi idi. Bakının apardığı ifşa siyasəti nəticəsində onilliklər ərzində formalaşmış “yazıq və məşəqqətlər görmüş erməni” obrazı birdəfəlik darmadağın edildi. Nəhayət, 44 gün davam edən müharibədə düşmən üzərində Qələbə tarixi ədalətin bərpası ilə nəticələndi.

Alim vurğulayıb ki, Ermənistan üzərində parlaq Zəfərin əldə edilməsi Prezident İlham Əliyevin apardığı davamlı praqmatik, sistemli siyasi kurs, uzaqgörən xarici diplomatiyasının bəhrəsi idi. Müharibə zamanı həyata keçirilən taktiki və strateji gedişlər dünya hərb ekspertləri üçün xüsusi önəm kəsb edən hadisədir.

Azərbaycan Respublikasının Prezidenti özündə yeni siyasi lider obrazını birləşdirməklə bərabər, həm də müharibə dövründə Azərbaycan xalqının tarixi ənənələrinə, hərbi-tarixi təcrübəsinə dərindən bələd olan bir şəxsiyyət kimi çıxış etdi. O, yeni hərbi strategiyanın nailiyyətlərini tarixi təcrübə ilə, xüsusilə də, ənənəvi sürətli türk hərb taktikası ilə birləşdirməklə dünya döyüş tarixinə yeni səhifə yazdı. Bütün zamanlarda müharibələrin taleyini həll etmiş sürətli türk hərb taktikasından Qarabağ döyüşlərində ustalıqla istifadə edilməsi erməni ordusu haqqındakı mifə son qoydu. Qırx dörd günlük müharibədə Ali Baş Komandan müzəffər ordusunun döyüşlərdəki uğurları ilə eyni vaxtda informasiya siyasətinin də başına keçərək Azərbaycanın haqq səsinin dünya mediasına və birliyinə çatdırdı, diplomatik sahədə və informasiya müharibəsində uğurlarımız Qarabağın işğaldan azad edilməsi prosesində Qələbəmiz üçün müstəsna əhəmiyyət kəsb etdi.

Müharibədə Qələbəni təmin edən digər faktorlardan biri də iqtisadi inkişafın, makroiqtisadi sabitliyin hərbi fəaliyyətə yönəldilməsidir. Həyata keçirilən rasional siyasi islahatlar milli iqtisadi inkişafa təkan verən fundamental amil olmaqla dövlətin müasir hərbi-texniki avadanlıqlarla təchizatına imkan yaratdı. İkinci Qarabağ müharibəsində Azərbaycanın Qələbəsini araşdıran Rusiya Elmlər Akademiyası Uzaq Şərq İnstitutunun baş elmi işçisi Vasili Kaşin iqtisadi islahatlar nəticəsində Azərbaycanın Ermənistana nisbətdə öz hərbi büdcəsini bir neçə dəfə artıra bildiyini vurğulayaraq yazırdı: “XXI əsrdə Azərbaycanın hərbi büdcəsi Ermənistanın hərbi büdcəsini 3-5 dəfə üstələyib; bəzi illərdə Azərbaycanın hərbi büdcəsi Ermənistanın bütün dövlət büdcəsindən daha çox olub”.

Beləliklə, ötən illər ərzində ölkədə iqtisadi və sosial rifahın gücləndirilməsi, dövlət idarəçiliyinin səmərəliliyinin artırılması və islahatlar, xalq-dövlət birliyi, xarici siyasətdə seçilən rasional istiqamət, ordu quruculuğunda qarşıya qoyulmuş məqsədlərə nail olunması digər məsələlərlə yanaşı, həm də Azərbaycan üçün bir nömrəli problem olan işğal siyasətinə son qoyulmasını təmin etdi.

Prezident İlham Əliyev sübut etdi ki, Azərbaycan xalqı qəhrəman xalqdır. O, həm də onu sübut etdi ki, Azərbaycan kimi çətin coğrafi mövqedə yerləşən türk-müsəlman dövlətinin taleyi onun liderindən və xalqından çox asılıdır. Bütün dünyada olduqca intensiv, gərgin, ziddiyyətli və qarışıq proseslərin getdiyi, qlobal trendlərdə qeyri-müəyyənliyin hökm sürdüyü bir mərhələdə dövlətin ərazi bütövlüyünü bərpa etmək, müharibədə dünyanın böyük dövlətlərinin Azərbaycanla hesablaşmasına nail olmaq və nəhayət, işğal altındakı torpaqları geri qaytarmaq, əlbəttə, tarixi hadisədir. Prezident İlham Əliyev Azərbaycanın ərazi bütövlüyünü bərpa edən bir lider kimi adını əbədi olaraq tarixə yazmaqla Azərbaycan xalqının qəhrəmanlıq salnaməsini yaratdı və 44 günlük Vətən müharibəsinin əsl qəhrəmanına çevrildi. O, müharibənin son akkordlarını belə vurdu: “Biz ərazi bütövlüyümüzü bərpa etmişik. Biz Qələbə qazanmışıq. Bizim bu gün gündəlikdə duran hər hansı başqa bir məsələmiz yoxdur. Biz öz sərhədlərimizə çıxmışıq, Ermənistan- Azərbaycan sərhədini nəzarətə almışıq. Biz artıq quruculuq işlərinə başlamışıq…”

Təbii ki, Azərbaycan Prezidentinin rəhbərliyi ilə çox tezliklə Qarabağ inkişaf etmiş ən müasir regiona çevriləcək.