QARS-GÜMRÜ DƏMİRYOL XƏTTİNİN İSTİFADƏSİNƏ DAİR ERMƏNİSTANIN TƏKLİFİ TÜRKİYƏ ÜÇÜN MƏQBUL DEYİL
Türkiyə Milli Təhlükəsizlik Xidmətinin baş katibi Yigit Alpdoğan bildirmişdir ki, Ermənistan qondarma soyqırımla əlaqədar tarixçilərdən ibarət komissiya yaradılmasına dair Türkiyənin təklifinə müsbət cavab vermədiyindən, bu ölkənin hər hansı təklifinə baxılması məqsədəuyğun deyildir. Onun sözlərinə görə, bu təklif Türkiyənin Ermənistanın qarşısında qoyduğu bir sıra tələblərə, o cümlədən Yerevanın Türkiyəyə, Azərbaycana ərazi iddialarından əl çəkməsi və Cənubi Qafqazda konstruktiv mövqe nümayiş etdirməsi şərtlərinə aprelin sonunadak prezident Robert Koçaryanın cavab verəcəyi halda müzakirə oluna bilər.
Türkiyənin Ermənistan-Azərbaycan, Dağlıq Qarabağ münaqişəsinin həlli istiqamətindəki danışıqları diqqətlə və yaxından izlədiyini bildirən Yigit Alpdoğan, ölkəsinin Cənubi Qafqazdakı münaqişələrlə bağlı ABŞ hökuməti ilə məsləhətləşmələr apardığını söyləmişdir.
Ermənistanın xarici işlər naziri Vardan Oskanyanın Dağlıq Qarabağ münaqişəsi bölgəsində sülhməramlı qüvvələrin yerləşdiriləcəyi təqdirdə Yerevanın türk qoşunlarının bu qüvvələrin tərkibində iştirakına razı olmayacağını bəyan etməsi Türkiyədə ermənilərin qeyri-konstruktiv mövqe tutması kimi qiymətləndirilmişdir.
Bölmənin digər xəbərləri
