Qax: arpa sahələrində orta məhsuldarlıq 34,4 sentnerdir
Qax, 12 iyun, Mustafa Dadaşov, AZƏRTAC
Qax rayonunun təsərrüfatlarında bir neçə gündür arpa biçininə başlanılıb. Rayonun Qıpçaq, Ağyazı, Almalı, Əlibəyli, Zəyəm, Tasmalı, Cəlayir kəndlərinin ərazilərindəki təsərrüfatlarda ilk günlər 154 hektar sahənin arpası biçilib, 530,4 ton məhsul tədarük olunub. Hələlik hər hektardan orta məhsuldarlıq 34,4 sentner təşkil edir.
Bu barədə AZƏRTAC-ın bölgə müxbirinə Qax Dövlət Aqrar İnkişaf Mərkəzinin bitkiçilik sektorunun baş məsləhətçisi Ülvi Əzimov məlumat verib.
Qurum rəsmisi bildirib ki, cari mövsümdə rayonda 13 min 26 hektar taxıl sahəsinin məhsulunun biçilməsi nəzərdə tutulur. Taxıl əkinlərinin 10 min 270 hektarını buğda, 2 min 756 hektarını dən üçün arpa sahələri təşkil edir. Biçin kampaniyasına, ümumilikdə, 31 ədəd taxılbiçən kombayn, həmçinin lazımi qədər şum traktoru, küləşpresləyən aqreqat, yük maşını, qoşqu və digər texnika cəlb edilib. Hazırda sahələrdə 13 ədəd kombayn işləyir.
Baş məsləhətçinin sözlərinə görə, mövsümün ilk günlərində rayon üzrə ən yüksək məhsuldarlıq Qax Aqroparkının taxıl sahələrində qeydə alınıb. Belə ki, burada hazırda arpa sahələrinin hər hektarından 45 sentnerədək məhsul götürülür.
Bölmənin digər xəbərləri
