QAXDA DSMF RAYON ŞÖBƏSİNİN İNZİBATİ BİNASININ AÇILIŞI OLMUŞDUR
Mərasimdə çıxış edən şöbənin müdiri Vüqar Əhmədzadə ölkəmizdə aparılan pensiya islahatlarından, şöbənin ötənilki fəaliyyətindən danışmış, ümummilli liderimiz Heydər Əliyevin müəyyənləşdirdiyi sığorta və pensiya sistemi islahatları əsasında əhalinin sosial müdafiəsinin gücləndirilməsini Prezident İlham Əliyevin həyata keçirdiyi sosial siyasətin əsas istiqamətlərindən biri kimi səciyyələndirmişdir.
DSMF sədrinin müavini Zakir Babayev pensiya və sığorta sistemində islahatların əhalinin aztəminatlı təbəqəsi olan pensiyaçıların yaşayış səviyyəsini yaxşılaşdırmaq məqsədi daşıdığını xüsusi vurğulamışdır. O, “Azərbaycan Respublikası Dövlət Sosial Müdafiə Fondunun potensialının gücləndirilməsi” layihəsinə dair BMT-nin İnkişaf Proqramı ilə imzalanmış sazişə uyğun olaraq, hazırda respublikamızda sığortaolunanların fərdi uçot sisteminin tətbiqinə başlanıldığını bildirmiş, Qax rayonu üzrə ilk sığorta şəhadətnaməsini təqdim etmişdir.
Açılış mərasimində çıxış edən rayon icra hakimiyyətinin başçısı Abbas Göyüşov Fondun rayon şöbəsinin inzibati binasının istifadəyə verilməsi münasibətilə şöbənin əməkdaşlarını təbrik etmiş, onlara işində uğurlar arzulamışdır.
Sonra mərasim iştirakçıları və qonaqlar şöbənin inzibati binasında yaradılan şəraitlə tanış olmuşlar.
