QAZAXDA MÜALİCƏ-DİAQNOSTİKA MƏRKƏZİ İSTİFADƏYƏ VERİLMİŞDİR
AZƏRTAC-ın müxbiri xəbər verir ki, sentyabrın 24-də Qazaxda Müalicə-Diaqnostika Mərkəzinin açılışı olmuşdur.
Tibb işçiləri mərasimdə iştirak etmək üçün buraya gələn Prezident İlham Əliyevi səmimiyyətlə qarşıladılar.
Dövlətimizin başçısı mərkəzin işçilərinə müraciətlə dedi:
-Qazax Müalicə-Diaqnostika Mərkəzinin açılışı münasibətilə sizi təbrik edirəm. İndi iştirak edəcək və baxacağam, amma bilirəm ki, burada ən gözəl avadanlıq quraşdırılıb, ən gözəl şərait var. Həm xarici görünüşü gözəldir, həm də avadanlığı, bütün təchizatı ən müasir standartlara uyğundur. Yəni burada ən yüksək tibbi xidmət almaq mümkündür və əminəm ki, bizim insanlarımız bu sağlamlıq ocağından istifadə edəcəklər. Həkimlər də onlara yaxşı baxmalı, yaxşı xidmət göstərməlidirlər. Əminəm ki, belə gözəl şəraitdə işləmək də çox xoş olacaqdır.
Tibb işçiləri ölkəmizin Prezidentə təşəkkürlərini bildirdilər.
Sonra dövlətimizin başçısı rəmzi açılışı bildirən lenti kəsdi, mərkəzlə tanış oldu.
Təməli 2005-ci ilin oktyabrında, Prezidentin Qazaxa səfəri zamanı qoyulan bu mərkəz Dövlət Neft Şirkətinin vəsaiti hesabına tikilmişdir. Dövlətimizin başçısı ötən il bu rayona səfəri zamanı tikinti işlərinin gedişi ilə maraqlanmış, müvafiq tapşırıq və tövsiyələrini vermişdi.
Ümumi sahəsi 9500 kvadratmetr olan yaraşıqlı üçmərtəbəli bina iki hektarlıq ərazidə yerləşir. Həyətdə geniş yaşıllıq zolağı salınmış, xəstələrin istirahəti üçün lazımi şərait yaradılmışdır. Binanın birinci mərtəbəsində təcili yardım, hemodializ, şüa-diaqnostika, kompyuter tomoqrafiyası şöbələri yerləşir.
Şüa-diaqnostika şöbəsi ilə yaxından tanış olan Prezident İlham Əliyevə məlumat verildi ki, mərkəzdə quraşdırılan bütün tibb aparatları, avadanlıq xaricdə istehsal olunmuşdur. Bunlar xəstələrin daha müasir üsullarla müayinəsinə imkan verəcək, onların müalicə üçün paytaxta və başqa yerlərə getməsinə ehtiyac qalmayacaqdır.
Dövlətimizin başçısı ikinci mərtəbədə yerləşən palatalarda yaradılan şəraitlə də tanış oldu, üçüncü mərtəbədəki cərrahiyyə blokuna baxdı. Burada ən müasir avadanlıq quraşdırılmışdır. Reanimasiya və terapiya şöbələri də bu mərtəbədə yerləşir. Müalicə-Diaqnostika Mərkəzinin ayrıca patoloji anatomiya korpusu, 40 nəfərlik yeməkxanası da vardır. Mərkəzdə 270-ə yaxın tibbi heyət çalışacaqdır. Qazax Müalicə-Diaqnostika Mərkəzinin xidmətindən təkcə bu bölgənin sakinləri deyil, qonşu Gürcüstanda yaşayan azərbaycanlılar da istifadə edə biləcəklər.
Yeni müalicə ocağında yaradılan şəraiti yüksək qiymətləndirən Prezident İlham Əliyev tibb işçilərini bir daha təbrik etdi, onlarla xatirə şəkli çəkdirdi.
Dövlətimizin başçısı Azərbaycanda səhiyyə göstərilən qayğının bundan sonra da davam etdiriləcəyini vurğulayaraq bir daha dedi ki, mərkəz yüksək dünya standartlarına cavab verir. Binanın həm xarici görünüşü gözəldir, həm də ən müasir avadanlıq, bütün şərait var. Bu, belə də olmalıdır. Hər bir rayonda belə gözəl binalar, xəstəxanalar olmalıdır.
######
 |
 |
 |
 |
Bölmənin digər xəbərləri
