QAZAXISTAN HÖKUMƏTİ BENZİN VƏ DİZEL YANACAĞINA QOYDUĞU QADAĞANIN MÜDDƏTİNİ İLİN SONUNADƏK UZATMIŞDIR
AZƏRTAC-ın xüsusi müxbiri xəbər verir ki, Qazaxıstan hökuməti bu il iyunun 1-dən sentyabrın 1-dək benzin və dizel yanacağına qoyduğu müvəqqəti qadağanın müddətini 2009-cu il yanvarın birinədək uzatmışdır. Bu il mayın 19-da qəbul edilmiş qərarda deyilir ki, qadağa daxili bazarda neft məhsullarının qiymətlərinin sabit saxlanması üçün qoyulmuşdur.
Sentyabrın 1-dən bu qadağaya məişət sobasında işlədilən yanacaq da əlavə olunmuşdur.
Qazaxıstan hökuməti sentyabrın 1-dən ölkədən taxılın ixracına qoyulan müvəqqəti qadağanı isə götürmüşdür. Xatırladaq ki, qadağa aprelin 15-də ölkənin ərzaq təhlükəsizliyinin təmin olunması və çörəyin qiymətinin sabit saxlanması məqsədilə tətbiq edilmişdi.
Qazaxıstan Kənd Təsərrüfatı Nazirliyinin proqnozuna əsasən, bu il taxıl yığımı mövsümündə hava şəraiti əlverişli olarsa, ölkədə 16-17 milyon ton məhsul istehsalı gözlənilir.
Əhalisinin sayı 15 milyon nəfər olan Qazaxıstanın taxıla olan illik tələbatı 10-11 milyon tondur. Məhsulun qalan hissəsi satışa çıxarılır.
Bölmənin digər xəbərləri
