Qazaxıstan köhnəlmiş SSRİ tikinti normalarını yeni standartlarla əvəz edir
Astana, 9 oktyabr, AZƏRTAC
Qazaxıstan Parlamentinin Məclisi yeni Tikinti Məcəlləsinin layihəsini birinci oxunuşda təsdiqləyib.
AZƏRTAC Qazaxıstan mətbuatına istinadla xəbər verir ki, Qazaxıstanın sənaye və tikinti naziri Yersayın Naqaspayev yeni məcəlləyə daxil edilən normaları sadalayıb.
Ekspertlər sənədi hazırlayarkən ölkənin yüksək seysmik təhlükəsini nəzərə alıblar.
“Qazaxıstan ərazisinin 45 faizzindən çoxu dağıdıcı zəlzələ riskli zonalarda yerləşir. Bu, xüsusilə Almatı, Almatı vilayəti, Jambıl, Türküstan və Şərqi Qazaxıstan vilayətlərinə aiddir. Yeni məcəllədə risklərin kompleks qiymətləndirilməsi, seysmik izolyasiya texnologiyalarından istifadə etməklə yeni obyektlərin layihələndirilməsi, mütləq seysmik mikrorayonlaşdırma, texniki obyektlərin ayrılması və obyektlərin texniki pasportlaşdırılmasını əhatə edən ayrıca fəsil nəzərdə tutulacaq”, - deyə nazir məlumat yayıb.
Eyni zamanda, nazirlik sovet dövründən qalma prinsiplərdən imtina etmək niyyətindədir,obyektlərin tikintisi yeni qaydada aparılacaq.
“Tikintidə bir çox normalar və qaydaları Sovet İttifaqı dövründən indiyədək qorunub saxlanılıb. Əlbəttə ki, müstəqillik illərində əhəmiyyətli dəyişikliklər edilib, 2010-2020-ci illərdə isə avrokodlar, yeni təhlükəsizlik və enerji səmərəliliyi standartlarının tətbiqi ilə genişmiqyaslı islahat həyata keçirilib. Lakin normaların bir hissəsi köhnəlib və müasir tələblərə cavab vermir”, - deyə Yersayın Naqaspayev izah edib.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
