QƏBƏLƏDƏ FARAŞ TƏRƏVƏZ İSTEHSALINA MARAQ ARTMIŞDIR
Qəbələ Rayon İcra Hakimiyyətindən AZƏRTAC-a bildirmişlər ki, rayonun torpaq mülkiyyətçiləri əsasən taxıl, meyvə və tərəvəz məhsullarının istehsalı ilə məşğul olurlar. Bu sahəyə marağın artması rayonda emal müəssisələrinin mövcud olması ilə əlaqədardır. Sahibkarlar öz məhsullarını sərfəli qiymətlərlə həmin müəssisələrə sata bilirlər.
Emal müəssisələrinin fəaliyyətdə olması fermer və şəxsi təsərrüfat sahiblərinin faraş tərəvəz istehsalı sahəsinə də marağını artırmışdır.
Hazırda rayonda yazlıq bitkilər əkini davam edir. Bu günədək 1.952 hektar sahədə yazlıq bitkilər əkilmişdir ki, bunun da 1.028 hektarını tərəvəz, 740 hektarını kartof, 147 hektarını çoxillik və 19 hektarını isə birillik bitkilər təşkil edir. Bütövlükdə ötən illə müqayisədə 111 hektardan çox sahədə yazlıq bitkilər əkilmişdir.
Rayonda, həmçinin, tütün, bostan məhsulları, qarğıdalı, günəbaxan və digər bitkilərin əkini üçün torpaq sahələrinin hazırlanması işi davam etdirilir. Bu ilin məhsulu üçün 600 hektar sahədə qarğıdalı əkininin aparılması nəzərdə tutulur. Bunun üçün mövcud toxum ehtiyatından əlavə rayona 1,4 ton yüksək keyfiyyətli “Zaqatala-68” sortlu qarğıdalı toxumu gətirilmişdir.
Bölmənin digər xəbərləri
