QƏDİM AFİNANIN VARLIĞINA QARIN YATALAĞI SON QOYMUŞDUR?
Alimlər eramızdan əvvəl tüğyan etmiş epidemiyanın konkret səbəbini uzun illər ərzində müəyyən edə bilməmişlər. Epidemiya afinalıların üçdə bir hissəsinin həyatına son qoymuşdur.
Mütəxəssislər Şimali Afrikadan Misirə, Liviya və Yunanıstana yayılmış epidemiyanın mümkün səbəblərindən biri kimi xiyarək formalı taunu, çiçəyi, Sibir xorasını və qızılcanı göstərirlər.
Bunun, həqiqətən, belə olub-olmadığını yoxlamaq üçün Afina Universitetinin alimləri paytaxt yaxınlığındakı Kerameykosda yerləşən antik qəbiristanda qazıntılar zamanı tapılan və təsadüfən zədələnməmiş üç dişin DNT analizini aparmışlar. Alimlərin ehtimalına görə, bu dişlər eramızdan əvvəl 430-cu ildə dəfn edilmiş qədim yunanlara məxsus idi.
Dişlər təmiz yuyulduqdan sonra onlardan pulpa (diş boşluğunu dolduran yumşaq toxuma) çıxarılmışdır. Tədqiqatçılar pulpanın bir sıra DNT testlərini keçirmiş və nəticələri xəstəliktörədən yeddi virus və bakteriyanın DNT nümunələri ilə müqayisə etmişlər. Alimlər DNT-lərin müqayisəli analizi nəticəsində pulpanın bütün nümunələrində qarın yatalağına səbəb olan bakteriyanın qədim ştammını aşkarlamışlar.
Ondan əvvəl alimlər epidemiyanın digər səbəblərini araşdırmış və bu zaman eramızdan əvvəl V əsrdə yaşamış yunan tarixçisi Sisidinin kitablarındakı məlumatlara əsaslanmışlar.
Alimlər qeyd edirlər ki, epidemiyanın daha sanballı mikrobioloji sübutları ilk dəfə əldə olunmuşdur.
Bölmənin digər xəbərləri
