Qənirə Paşayeva: Azərbaycan Prezidenti üçün insanların sağlamlığı həmişə birmənalı şəkildə birinci yerdə olub
Bakı, 11 iyun, Səadət Hakıyeva, AZƏRTAC
Prezident İlham Əliyevin və birinci xanım Mehriban Əliyevanın iştirakı ilə iyunun 9-da modul tipli xəstəxana komplekslərinin açılışında dövlətimizin başçısının söylədiyi fikirlər xüsusi diqqət çəkir. Azərbaycan Prezidentinin və Birinci vitse-prezidentin xəstəxanaların açılışında iştirakı həkimlərimizin, tibb heyətinin gücünə güc qatır, xəstələrə qüvvətli inam aşılayır. Həm yeni səhiyyə ocaqlarının açılışı, həm də dövlət başçısının açılışlarda iştirakı, Prezident İlham Əliyevin çıxışı ölkəmizdə koronavirusla bağlı psixoloji durumun gərginlikdən daha uzaq tutulması baxımından da çox faydalıdır.
Bu fikirləri AZƏRTAC-a açıqlamasında Milli Məclisin Mədəniyyət komitəsinin sədri Qənirə Paşayeva söyləyib.
Q.Paşayeva vurğulayıb ki, dövlət başçısı və xanımının tibbi maskadan istifadə etməsi, Prezidentin tibbi maskadan istifadə ilə bağlı dedikləri, bu mövzuda bir daha çağırışlar etməsi diqqətçəkən məqamlardandır. Azərbaycan Prezidenti birmənalı olaraq vətəndaşları ehtiyatlı olmağa, sanitar-gigiyena qaydalarına riayət etməyə çağırdı. Prezident və xanımı həm nümunə göstərir, həm də vətəndaşlara səmimi müraciət edərək onları sağlamlıqlarını qorumağa çağırır. Beləliklə, yeni modul tipli xəstəxana komplekslərinin quraşdırılması ilə səhiyyə sistemimiz əlavə 2000 çarpayılıq ehtiyat əldə etmiş oldu. Virusa yoluxmuş, yaxud risk qrupuna daxil olan vətəndaşlarımızın vacib, təxirəsalınmaz tibb xidmətlərinin təmin olunması üçün vahid idarəetmə sistemi yaradıldı. Modul tipli xəstəxanaların istifadəyə verilməsindən başqa, ölkənin sənaye imkanlarından istifadə etməklə qısa zaman kəsiyində tibbi maska müəssisələrinin fəaliyyətə başlaması, dezinfeksiya vasitələrinin respublika daxilində istehsalı, həkimlər üçün özəl geyimlərin - kombinezonların istehsalı, bütün bunlar qlobal pandemiya təhlükəsi qarşısında müdafiə üçün dövlət tərəfindən vətəndaşa təqdim edilmiş çoxtərəfli, düşünülmüş tədbirlərdən xəbər verir.
Prezident İlham Əliyevin də qeyd etdiyi kimi, bütün bunlardan yüksəkdə Azərbaycan vətəndaşı və onun sağlamlığı ilə bağlı görülən işlər dayanır. İqtisadiyyatı və ya insanların sağlamlığını xilas etmək seçimində məhz ikinciyə üstünlük verilib. Biz pandemiya elan olunan gündən Azərbaycan dövlətinin, şəxsən dövlət başçısının atdığı addımları bir cümləyə sığdırmalı olsaq, deyə bilərik ki, Azərbaycan Prezidenti İlham Əliyev üçün insanların sağlamlığı həmişə, birmənalı və tərəddüdsüz şəkildə birinci yerdə olub.
Deputat diqqətə çatdırıb ki, karantin rejiminin qaydalarında yumşalmalar tətbiq olunduqca yoluxma sayının kəskin artmasını gördük. İsti yay günlərində sərt karantin rejiminin çətin olduğu hamımıza aydındır. Amma vətəndaşlar da bilirlər ki, bu məhdudiyyətlərin əsas səbəbi insanları qorumaqdır.
Q.Paşayeva deyib: “Dövlət başçısının da bildirdiyi kimi, Azərbaycan dünya miqyasında nadir ölkələrdəndir ki, COVID-19-a yoluxan bütün xəstələr tibb müəssisələrində müalicə alırlar. Azərbaycanda koronavirusdan ölənlərin sayının az olmasının səbəblərindən biri də məhz budur ki, virusa yoluxmuş bütün xəstələr tibbi müəssisələrə qəbul edilir və onlara lazımi xidmət göstərilir. Dövlətimiz xarici ölkələrdə qalan vətəndaşlara da öz diqqət və qayğısını əsirgəmir. Həmin vətəndaşlar üçün xüsusi portal yaradılıb. Portalda qeydiyyatdan keçən vətəndaşlar növbəlilik əsasında dövlət hesabına ölkəmizə gətirilir”.
Deputat bildirib ki, Prezidentin diqqət yetirdiyi məsələlərdən biri də koronavirus pandemiyasına qarşı mübarizədə özəl sektorla əməkdaşlıq məsələsidir. Qlobal pandemiyaya qarşı mübarizədə ölkədaxili tədbirlər siyahısında on xəstəxana kompleksinin tikilməsinin məqsədəuyğun sayıldığını, onların dördünü özəl sektorun öz vəsaiti hesabına inşa edəcəyini vurğulayan Prezident bununla dövlətin üzərindəki yükün bir qədər azalacağını bildirib. Dövlətimizin başçısı hər dəfə vətəndaşlara həssaslıqla yanaşır, onların müsbət işlərini dəyərləndirir. Prezident Koronavirusla Mübarizəyə Dəstək Fonduna sahibkarlar və adi vətəndaşlar hesabına yığılan vəsaitin 100 milyon manatı ötdüyünü bildirib və bunun üçün təşəkkür edib. O deyib ki, xalqımız hər zaman çətin günlərdə bir-birinə arxa, dayaq olur. Bu da bizim dəyərlərimizdən biridir.
“Hər zaman qlobal əməkdaşlığa və təhlükəsizliyə verdiyi töhfələrlə yadda qalan Azərbaycan bu çətin dövrdə ehtiyacı olan ölkələrə humanitar yardımını əsirgəmir. Çətin gündə arxa, dayaq olmaq xalqımızın, dövlətimizin böyüklüyünün göstəricisidir”, - deyə Qənirə Paşayeva fikirlərini yekunlaşdırıb.
Bölmənin digər xəbərləri
