Qərb direktivlərinin real həyata implentasiyası Ermənistan üçün ağır nəticələr verə bilər ŞƏRH
Bakı, 14 sentyabr, AZƏRTAC
İran tərəfindən Azərbaycana qarşı münasibətin kardinal olaraq dəyişməsi Ermənistanın apardığı məqsədsiz və proqramsız xarici siyasət kursu ilə birbaşa bağlıdır. Qırx ildən çox müddət ərzində Qərbin sanksiyaları ilə mübarizə aparan İran indi şimal sərhədlərində, yəni, Ermənistanda Qərblə açıq konfrantasiya şəklinə qədər gəlib çıxıb. Bu vəziyyətin yaranmasının yeganə günahkarı Ermənistanın hazırkı siyasi rəhbərliyidir. İran daim Qafqazda sərhədlərin dəyişdirilməsini özünün qırmızı xətti adlandırıb və prosesin regiondan kənar qüvvələr tərəfindən icra edilməsinə qarşı olmasını bildirib. İndiki vəziyyətdə Avropa İttifaqının (Aİ) müşahidə missiyasının daxilində bölgəyə nüfuz edən Avropanın xüsusi xidmət orqanlarının əməkdaşları azmış kimi, ABŞ hərbçilərinin bölgədə müştərək hərbi təlimlər keçirməsi İranın milli maraqlarına birbaşa təhdiddir. Bu, əslində Ermənistanın İrana qarşı xəyanəti kimi də qiymətləndirilə bilər. Ermənistanı 30 il ərzində siyasi və iqtisadi cəhətdən dəstəkləyən və bu ölkəyə PUA ixrac edən İran hazırkı yaranmış vəziyyətdən olduqca narahatdır.
Bu sözləri AZƏRTAC-a açıqlamasında politoloq Amid Əliyev söyləyib.
O bildirib ki, son bir həftə ərzində İranın siyasi və hərbi elitası erməni siyasətindən nəzərəçarpacaq dərəcədə məyus şəkildə Azərbaycanla münasibətlərin normallaşması istiqamətində vacib addımlar atmağa məcbur oldu. İran hərbçilərindən ibarət yüksək səviyyəli nümayəndə heyətinin ölkəmizə səfərə gəlməsi, Bakıdakı Hərbi Qənimətlər Parkını ziyarət etmələri və Azərbaycanla sərhəddə heç bir qüvvə toplanmaması haqqında bəyanat verməsi onu deməyə əsas verir ki, rəsmi Tehran dövlətimizin həyata keçirdiyi sülh siyasətini dəstəkləməyə başlayıb.
Onun sözlərinə görə, Ermənistanın apardığı qərbyönümlü siyasətin bölgəyə hüzur gətirməyəcəyi belə ən yüksək səviyyədə İran Prezidenti tərəfindən telefonla Ermənistan baş nazirinin nəzərinə çatdırılıb. Bu, indiki vəziyyətdə Qərbin qucağına qaçan Ermənistanda siyasi və iqtisadi vəziyyətin acınacaqlı olacağı ehtimalını deməyə əsas verir. Rusiyaya qarşı hazırkı münasibət, İranın milli maraqlarına olan təhdidlər, beynəlxalq müşahidəçi adı altında kəşfiyyat sisteminin Ermənistana nüfuz etməsi kimi detallar yaxın zamanlarda başa verə biləcək real siyasi və hərbi proseslərdə bu ölkənin tək olacağına faktiki işarədir.
“Müstəqilliyi illərində ilk dəfə olaraq Rusiyanın Ermənistana nota verməsi və yuxarıda qeyd olunan faktların rəsmi müraciətdə öz əksini tapması və eləcə də Vladimir Putinin ötən gün Vladivostokda söylədiyi fikirlər İrəvan üçün heç də yaxşı olmayan ssenarinin icra olunacağını deməyə əsas verir. Ermənistan siyasi hakimiyyətinin bölgədə olan qonşularına və regional güclərə qarşı Qərb direktivlərini bilərəkdən real həyata implentasiya etməsi erməni cəmiyyəti üçün ağır nəticələr verəcək. Nə İran, nə Türkiyə, nə Rusiya, nə də Azərbaycan bölgədə Qərbin dominant olaraq Ermənistan üzərindən bölgəyə tam şəkildə sahiblənməsinə imkan verməyəcək. Bu məsələdə balanslı siyasət aparmaq olduqca vacibdir. Ermənistan isə bu balansı artıq pozub. Belə ki, Qərbi bölgəyə məcburi cəlb etməklə, Avropa İttifaqının mülki missiyasını sərhədə yerləşdirməklə, Rusiya əleyhinə Nikol Paşinyanın həyat yoldaşı Anna Akopyanın Ukraynaya səfər etməsi və yardımın göstərilməsi kimi faktlar siyasi mənada Ermənistanın sonunu yaxınlaşdıra bilər.
İran Ermənistana bölgədə “3+3” formatı çərçivəsində əməkdaşlığın vacibliyini vurğulayaraq prosesləri Azərbaycanın ərazi bütövlüyü çərçivəsində həll olunmasının vacibliyini özünün XİN nümayəndəsi vasitəsilə çatdırıb. Bundan sonrakı proseslər Ermənistanın yaxın günlərdə atacağı siyasi addımlardan asılı olacaq. Çünki Azərbaycan öz prinsiplərini açıq şəkildə bəyan edib”, - deyən politoloq fikirlərini yekunlaşdırıb.
Bölmənin digər xəbərləri
