DÜNYA
Qərbi Balkan ölkələri Türkiyəyə humanitar yardımları davam etdirir
Sarayevo, 26 fevral, AZƏRTAC
Qərbi Balkan ölkələrindən Bosniya və Herseqovina, Serbiya və Monteneqrodan Türkiyədə dağıdıcı zəlzələlərdən zərərçəkmiş insanlar üçün növbəti humanitar yardım karvanları yola düşüb.
AZƏRTAC xəbər verir ki, Bosniya və Herseqovinadan 4 yük maşını ilə zəlzələ bölgələrinə geyim, ayaqqabı, yorğan-döşək, qızdırıcılar, ərzaq və gigiyena məhsulları göndərilib. Bundan başqa, Sarayevoda xeyriyyə yarmarkası təşkil olunub, toplanan vəsait Türkiyənin Fövqəladə Halların İdarə Olunması Agentliyinin (AFAD) hesabına köçürülüb. Bu vaxtadək toplanan ianələrin 2 milyon avronu keçdiyi, ümumilikdə 50-60 yük maşınının zəlzələ bölgələrinə gedəcəyi bildirilib.
Serbiyada fəaliyyət göstərən qeyri-hökumət təşkilatları tərəfindən toplanan humanitar yardımları daşıyan yük maşınları Belqraddan Türkiyəyə yola salınıb. Müsəlmanların daha çox yaşadığı Novi Pazar şəhərində zəlzələdən zərərçəkənlər üçün maddi yardımlar toplanıb.
Monteneqroda da bosniyalıların sıx məskunlaşdığı bölgələrdən Türkiyəyə növbəti yardımlar göndərilib.
Nihad Budaqov
AZƏRTAC-ın xüsusi müxbiri
Sarayevo