Qətər dövlətinin milli bayramı - Müstəqillik günü münasibətilə Sizi və xalqınızı ürəkdən təbrik edirəm.

Əminəm ki, Azərbaycan ilə Qətər arasında yaranmış dostluq və əməkdaşlıq münasibətlərinin inkişafı daim xalqlarımızın mənafeyinə xidmət edəcəkdir.

Sizə möhkəm cansağlığı, işlərinizdə uğurlar, dost Qətər xalqına sülh və firavanlıq arzulayıram.

Hörmətlə,

Heydər Əliyev,

Azərbaycan Respublikasının Prezidenti.

26 avqust 2003-cü il.

***

AZƏRBAYCAN VƏ QAZAXISTANIN NEFT SAHƏSİNDƏ UĞURLU ƏMƏKDAŞLIĞI BUNDAN SONRA DA DAVAM EDƏCƏKDİR

AZƏRBAYCAN RESPUBLİKASININ BAŞ NAZİRİ İLHAM ƏLİYEV QAZAXISTANIN “KAZMUNAYQAZ” ŞİRKƏTİNİN NÜMAYƏNDƏ HEYƏTİNİ QƏBUL ETMİŞDİR

Sentyabrın 2-də Azərbaycan Respublikasının Baş naziri İlham Əliyev Qazaxıstan neftinin Bakı-Tbilisi-Ceyhan əsas ixrac boru kəməri ilə nəqli məsələləri üzrə danışıqlar aparmaq üçün Bakıya gəlmiş “KazMunayQaz” neft şirkətinin nümayəndə heyətini qəbul etmişdir.

Nümyəndə heyətinin rəhbəri, “KazMunayQaz” şirkətinin birinci vitse-prezidenti TİMUR KULİBAYEV Azərbaycanın Baş nazirinə təşəkkür edərək dedi:

-Hörmətli cənab Baş nazir! Vaxt ayırıb bizi qəbul etdiyiniz üçün Sizə minnətdarlığımızı bildiririk. Biz bilirik ki, Sizin iş cədvəliniz çox gərgindir.

Qısaca olaraq Sizə Qazaxıstan və Azərbaycan prezidentlərinin tapşırığı ilə neftin və qazın nəqlinə dair görülən işlər barədə məlumat vermək istərdik. Nümayəndə heyətimizin üzvü cənab Kabıldin işçi qrupu çərçivəsində danışıqlar aparır. Deməliyəm ki, biz qarşıya qoyulmuş məsələlərin yerinə yetirilməsi sahəsində ciddi irəliləyiş əldə etmişik.

Baş nazir İLHAM ƏLİYEV məlumat üçün təşəkkürünü bildirərək dedi:

-Biz cənab Kabıldinlə bu danışıqlar çərçivəsində Londonda görüşmüşük. Mən sizi salamlayıram, Azərbaycana xoş gəlmisiniz, sizin gəlişinizə çox şadıq.

Deməliyəm ki, bu danışıqlar hələ ötən ilin dekabrında başlayıbdır. Onda biz ilk dəfə birgə görüş keçirdik. Sonra razılığa gəldik ki, bu görüşlər daimi əsaslarla Qazaxıstanda və Azərbaycanda davam etdiriləcəkdir.

Son zamanlara qədər mən özüm bu prosesin fəal iştirakçısı idim. Bu layihənin dövlətlərimiz üçün böyük əhəmiyyəti olduğunu nəzərə alaraq, bundan sonra da onun həyata keçirilməsində fəal iştirak edəcəyəm. Düşünürəm ki, layihə təkcə neft şirkətləri üçün deyil, ümumilikdə dövlətlərimizin gələcəyi üçün çox vacibdir.

Çox məmnunam ki, bu proses Qazaxıstan və Azərbaycan arasında qarşılıqlı anlaşma şəraitində davam edir. Bizdə Bakı-Tbilisi-Ceyhan neft kəmərinin tikintisində əməli nəticələr əldə olunmuşdur. Bu yaxınlarda Natiq Əliyevlə neft kəmərinin tikintisinin aparıldığı yerə baş çəkdik. Kabinetdə oturub danışmaq, qərarlar qəbul etmək, müzakirələr aparmaq məsələnin bir tərəfidir, tozun içərisində və qızmar çöldə tikinti işləri ilə bilavasitə tanış olmaq isə məsələnin digər tərəfidir. Deməliyəm ki, bu gün orada bizim gələcək inkişafımızın təməli qoyulur.

Əlbəttə, bu sahədə sizin ölkənizlə aparılan danışıqlar böyük əhəmiyyət kəsb edir. Düşünürəm ki, artıq bir sıra nailiyyətlər əldə etmişik. Biz ölkələrimizin potensialını təhlil edərək, bütün bu məsələləri təfərrüatı ilə müzakirə edəcəyik.

Sağ olun, sizə uğurlar arzulayıram.

X X X

Qəbulda Azərbaycan Dövlət Neft Şirkətinin prezidenti Natiq Əliyev, Qazaxıstanın “Kazmortransflot” şirkətinin baş direktoru Kayrat Krımov, Qazaxıstanın ölkəmizdəki səfiri Andar Şukputov iştirak edirdilər.

***

AZƏRBAYCAN RESPUBLİKASININ BAŞ NAZİRİ CƏNAB İLHAM ƏLİYEVƏ

Zati-aliləri,

Azərbaycan Respublikasının Baş naziri təyin olunmağınız münasibətilə Sizi təbrik etməkdən böyük məmnunluq duyuram.

Mən məmnunam ki, Malayziya və Azərbaycan xalqları arasındakı sıx dostluq əlaqələri illərin sınağından keçərək möhkəmlənmişdir. Ticarət-iqtisadi əlaqələri daha da genişləndirmək üçün böyük imkanlarımız var.

Ümid edirəm ki, qarşıdakı illərdə Zati-alinizlə birlikdə işləyərək, dostluq və əməkdaşlığımızı daha da möhkəmləndirəcəyik.

Zati-aliləri, Sizə olan yüksək ehtiram hisslərini qəbul etməyinizi xahiş edirəm.

Doktor Mahatir bin Məhəmməd

Malayziyanın Baş nazir

***

AZƏRBAYCAN RESPUBLİKASININ BAŞ NAZİRİ CƏNAB İLHAM ƏLİYEVƏ

Hörmətli cənab Baş nazir,

Sizi Baş nazir vəzifəsinə təyin olunmağınız münasibətilə səmimi qəlbdən təbrik edirəm.

Əminəm ki, Azərbaycan hökumətinin başçısı təyin olunmağınız ölkələrimizin səmərəli iqtisadi, siyasi əməkdaşlığının və xalqlarımız arasında ənənəvi dostluq və mehribanlıq əlaqələrinin inkişafına xidmət edəcəkdir.

Polşa Respublikasının Nazirlər Şurası adından və şəxsən öz adımdan Azərbaycan xalqına dövlət suverenliyinin möhkəmlənməsində uğurlar, tərəqqi və firavanlıq, cənab Baş nazir, Sizə isə dövlətinizin qarşısında duran məsələlərin həll olunmasında böyük qüvvə arzulayıram.

Leşek Miller Polşa Respublikası Nazirlər

Şurasının sədri

Varşava, 20 avqust 2003-cü il.

***

AZƏRBAYCAN RESPUBLİKASI PREZİDENTİNİN MƏTBUAT XİDMƏTİNİN MƏLUMATI

Azərbaycan Respublikasının Prezidenti cənab Heydər Əliyev humanizm və insanpərvərlik prinsiplərinə, azadlıq və demokratiya ideallarına inamını bir daha təsdiq edərək, cəzadan azadetmənin tərbiyəvi əhəmiyyətinə inanaraq, hüququn aliliyinə və ədalətə əsaslanan cinayət-hüquq siyasətini həyata keçirərək, İkinci dünya müharibəsində faşizm üzərində qələbənin ildönümü münasibətilə amnistiyanın elan edilməsi məqsədi ilə qanunvericilik təşəbbüsü ilə çıxış etmişdir. Azərbaycan Respublikasının Milli Məclisi dövlət başçısının bu insanpərvər addımını dəstəkləyərək, 2003-cü il 6 may tarixdə amnistiya elan etmişdir.

Bu, son dövrdə qəbul edilmiş yeddinci amnistiya qərarı olmaqla, ölkə Prezidenti cənab Heydər Əliyevin rəhbərliyi ilə demokratik və hüquqi dövlət quruculuğu sahəsində aparılan humanist siyasətin təzahürüdür.

Cinayət qanunvericiliyinin humanistləşdirilməsi, müasir standartlara cavab verən yeni Cinayət və Sinayət-Prosessual Məcəllələrinin qəbulu, bir çox əməllərin dekriminallaşdırılması, cinayətlərə görə müəyyən edilmiş sanksiyaların yüngülləşdirilməsi, Azərbaycan Respublikasının “İnsan hüquqları və əsas azadlıqlarının müdafiəsi haqqında” Avropa Konvensiyasına qoşulması, ölkəmizin Avropa İnsan Hüquqları Məhkəməsinin yurisdiksiyasını tanıması, cəzaçəkmə müəssisələri sisteminin yenidən qurulmasının müasir və mütərəqqi penitensiar sistem çərçivəsində məhkumların islah olunmalarına müsbət təsiri və növbəti amnistiyanın elan edilməsi - bütün bunlar həmin siyasətin tərkib hissəsidir.

Amnistiya haqqında qərarın mahiyyəti və əhəmiyyətinin ictimaiyyətə çatdırılması üçün kütləvi informasiya vasitələrində geniş izahat işləri aparılmış, amnistiyanın icrasının vaxtında və düzgün yerinə yetirilməsi məqsədi ilə Azərbaycan Respublikasının Ədliyyə Nazirliyi, Ali Məhkəməsi, Baş Prokurorluğu və amnistiyanı tətbiq edən digər orqanlar tərəfindən tədbirlər hazırlanıb həyata keçirilmiş, cəzaçəkmə müəssisələrində, istintaq təcridxanalarında və xüsusi müəssisələrdə məhkumlarla görüşlər keçirilmiş, azadlıqdan məhrumetmə yerlərindən azad olunan şəxslərin sosial reabilitasiyası məqsədi ilə müvafiq tədbirlər görülmüşdür.

Hazirda cəzaları icra edən orqanlar tərəfindən bu qərarın icrası üçün amnistiya aktında nəzərdə tutulmuş üç aylıq müddət başa çatmışdır. Aparılmış ümumiləşdirmə nəticəsində müəyyən edilmişdir ki, bu müddət ərzində Ədliyyə Nazirliyinin Məhkəmə Qərarlarının İcrası Baş İdarəsinin müəssisələrində cəza çəkən 3206 şəxs cəzadan tam azad edilmişdir. 1929 məhkumun cəzası azaldılmış və ya daha yüngül cəza növü ilə əvəz edilmişdir. Bundan əlavə, azadlıqdan məhrumetmə ilə bağlı olmayan müxtəlif cəzalara məhkum olunmuş 5707 şəxs cəzadan azad edilmişdir. Təhqiqat, ibtidai istintaq orqanları və məhkəmələr tərəfindən ibtidai araşdırma və məhkəmə baxışı mərhələsində olan işlər üzrə 2880 şəxsə amnistiya tətbiq edilmişdir.

Belə ki, Ədliyyə Nazirliyinin Məhkəmə Qərarlarının İcrası Baş İdarəsinin müəssisələrindən azad edilmiş məhkumlardan 2430 şəxs cəzaçəkmə müəssisələrindən, 776 şəxs isə xüsusi müəssisələrdən azad edilmişdir. Bunlardan azadlıqdan məhrumetmə cəzasının çəkilməmiş hissəsi altı aydan artıq olmayan 1462 şəxs törətdikləri cinayətlərdən və amnistiya aktında nəzərdə tutulmuş məhdudiyyətlərdən asılı olmayaraq, cəzadan azad edilmişdir. Həmçinin, qəsdən cinayət törətdiklərinə görə 3 ildən artıq müddətə azadlıqdan məhrumetməyə məhkum olunmuş 409 şəxsin cəzalarının çəkilməmiş müddətinin üçdə bir hissəsi azaldılmışdır. 1520 şəxsin azadlıqdan məhrumetmə cəzası azadlığın məhdudlaşdırılması və ya intizam xarakterli hərbi hissədə saxlama cəzası ilə əvəz edilmişdir.

Amnistiyanın tətbiqi nəticəsində intizam xarakterli hərbi hissədə saxlama cəzasını çəkən 89 nəfər cəzalarından tam azad edilmişdir. Əsas və əlavə cəza kimi cərimə cəzasından azadetmə ilk dəfə olaraq məhkəmə nəzarətçiləri tərəfindən həyata keçirilərək, 3241 şəxs 4384 milyon manat məbləğində cərimədən azad edilmişdir.

Vətəndaşlıq borcunu tam dərk etməyərək, hərbi xidmət keçmə qaydası əleyhinə cinayət törətmiş 417 hərbi qulluqçu barəsində amnistiya tətbiq edilərək, onların Vətən qarşısında öz müqəddəs borclarını yerinə yetirmələrinə şərait yaradılmışdır.

Ümumiyyətlə, barələrində amnistiya tətbiq edilərək cinayət məsuliyyətindən və ya cəzadan azad edilmiş, cəzaları azaldılmış və ya daha yüngül cəza növü ilə əvəz edilmiş 13722 şəxs bu qərarın təsiri altına düşmüşdür.

Təhqiqat, ibtidai istintaq orqanları və məhkəmələr tərəfindən “İkinci dünya müharibəsində faşizm üzərində qələbənin ildönümü münasibətilə amnistiya haqqında” Azərbaycan Respublikası Milli Məclisinin 2003-cü il 6 may tarixli qərarının tətbiqi davam etdirilir.

Azərbaycan Respublikasının Prezidenti əmin olduğunu bildirmişdir ki, amnistiya aktına əsasən, cinayət məsuliyyətindən və cəzadan azad olunmuş şəxslər öz vətəndaşlıq borcunu və vəzifələrini layiqincə yerinə yetirəcəklər, qanunlara hörmət ruhunda davranaraq, Vətənə və xalqa sədaqətlə xidmət edəcəklər.