QHT sədri: Ümid edirik ki, Ermənistan dövləti itkin şəxslərin yerlərini Azərbaycan tərəfinə bildirəcək
Bakı, 30 avqust, AZƏRTAC
Avqustun 30-da - Beynəlxalq İtkinlər Günündə azərbaycanlı itkin ailələri Şəhidlər xiyabanına gələrək Vətənimizin müstəqilliyi və ərazi bütövlüyü uğrunda mübarizədə canlarını qurban vermiş naməlum şəhidlərin xatirəsini anıb, məzarları üstünə güllər düzüblər.
“Regional İnsan Hüquqları və Media Mərkəzi” İctimai Birliyinin sədri Xalid Kazımov AZƏRTAC-a müsahibəsində Birinci Qarabağ müharibəsində Kəlbəcər rayonunun Başlıbel kəndinin işğal zamanı ən çox itkin verən yerlərdən biri olduğunu deyib. Bildirib ki, bu günədək kəndin 11 üzvü itkin sayılır. 1993-cü il aprelin 2-də Kəlbəcər rayonu işğal olunan zaman həmin ərazidə 62 kənd sakini qalmışdı. Həmin sakinlər aprelin 18-dək işğalçılara müqavimət göstərmişdilər. Başlıbel kəndi Ermənistan silahlı birləşmələrinin işğalı altında olduğu müddətdə ümumilikdə 27 nəfər itkin sayılırdı.
Xalid Kazımov qeyd edib ki, torpaqlarımız işğaldan azad olunandan sonra itkin şəxslərdən 12 nəfərinin cəsədlərinin yerləri məlum olub. İtkin düşən 12 nəfərin cəsədləri üzərində 2021-ci ildə müvafiq istintaq hərəkətləri aparıldıqdan sonra Kəlbəcərdə dəfn edildi. Sonrakı müddətdə daha 3 nəfərin basdırıldığı yer müəyyənləşib. Bu günədək 12 nəfər itkin sayılır. Şahid ifadələrinə əsasən, onlardan 7-si sonuncu dəfə Kəlbəcər rayon mərkəzində və Nadirxanlı kəndində ərazisində görünüb. Beş nəfər isə Başlıbel kəndi və yaxın kəndlərin ərazisində itkin olduğu ehtimal edilir, bu günə qədər cəsədləri tapılmayıb.
“İrqindən, milliyyətindən asılı olmayaraq, heç bir şəxsin itkin düşməsini arzulamırıq. Ümid edirik ki, digər itkin şəxslərin də olduğu yerlər müəyyənləşəcək. “Regional İnsan Hüquqları və Media Mərkəzi” İctimai Birliyi olaraq itkinlər, qətlə yetirilənlər ilə bağlı ingilis dilində iki kitab nəşr etdirmişik və beynəlxalq təşkilatlara çatdırmışıq. Ümid edirik ki, Ermənistan dövləti itkin düşmüş şəxslərin yerini Azərbaycan tərəfinə bildirəcək”, - deyə o əlavə edib.
Qarabağ müharibəsində itkin düşmüş Firuz Cəlilovun bacısı Ədilə Mustafayeva isə onun itkin düşməsindən artıq 31 il ötdüyünü deyib. Bildirib ki, 1993-cü ilin avqustunda qardaşı Firuz Cəlilov özünün idarə etdiyi hərbi təyyarədə ermənilər tərəfindən vurulub. “Biz onun taleyi ilə bağlı heç bir məlumat ala bilməmişik. Biz istəyirik ki, heç olmasa, itkinlərimizin taleyinə hər hansı formada aydınlıq gətirilsin. Arzu edirik ki, bütün itkinlərimiz, qardaşım tez bir zamanda tapılsın. Bizlərin də ziyarət edə biləcəyimiz bir yer olsun. Dövlətimizin başçısı daim bizim arxamızda dayanır, bütün köməyi edir. Buna görə ona nə qədər təşəkkür etsək azdır. Allah dünyamıza sülh nəsib etsin, ölkəmizə bu bəlanı bir daha göstərməsin”, - deyə Ədilə Mustafayeva əlavə edib.
İtkin düşmüş Qəhrəman İmanovun bacısı Təranə İmanova isə qardaşının 1993-cü ildə könüllü olaraq müharibəyə getdiyini söyləyib. O, eyni zamanda, qeyd edib: “Döyüşlərə getdiyi gündən ondan heç bir xəbər ala bilmədik. Bütün bu illəri gözlərimiz yollarda qalıb. Anam ömrünün sonunadək oğlunun həsrəti ilə yaşadı, onun yolunu gözlədi. Biz Prezidentimizə, dövlətimizə inanırıq. Əminik ki, bütün itkinlərimizdən xəbər alacağıq. Allah şəhidlərimizə rəhmət eləsin, Ordumuzu qorusun”.
Zəngilan-Qubadlı istiqamətində gedən döyüşlərdə itkin düşən Çingiz Zeynalovun bacısı Nəzakət Rzazadə isə tək istəklərinin qardaşından bir xəbər almaq olduğunu bildirərək deyib: “Bizim getməyə, ziyarət etməyə bir yerimiz yoxdur. İntizarla gözləyirik ki, qardaşım Çingizdən bir xəbər alaq. Onun da ziyarət edə biləcəyimiz bir məzarı olar. Qardaşım Birinci Qarabağ müharibəsi zamanı könüllü olaraq döyüşlərə qoşulmuşdu. Zəngilanda, Qubadlıda gedən döyüşlər zamanı mühasirəyə düşüb. 1992-ci ildən bu günədək ondan heç bir xəbər ala bilməmişik. Biz daim Prezidentimizə arxalanmışıq, ona inanırıq. Allah bizim dövlətimizi heç zaman darda qoymasın”.
Bölmənin digər xəbərləri
