Qida Təhlükəsizliyi İnstitutunun laboratoriyalarında tələbələrə nəzəri və təcrübi biliklər öyrədilir
Bakı, 8 aprel, AZƏRTAC
Qida Təhlükəsizliyi İnstitutu ali təhsil müəssisələri ilə qarşılıqlı əməkdaşlığı davam etdirir. Əməkdaşlıq çərçivəsində Azərbaycan Tibb Universitetinin İctimai səhiyyə fakültəsinin sonuncu kurs tələbələri müəyyən olunmuş vaxtlarda institutun nəzdində fəaliyyət göstərən laboratoriyalarda təcrübə keçirlər.
İnstitutun İctimaiyyətlə əlaqələr və maarifləndirmə departamentindən AZƏRTAC-a verilən məlumata görə, təcrübəyə cəlb olunan tələbələr qida təhlükəsizliyi, heyvan və bitki sağlamlığı ilə bağlı laboratoriyalarda müayinələrin aparılmasında, həmçinin nəzəri və təcrübi biliklərin öyrənilməsində iştirak edirlər. Təcrübə zamanı tələbələr nümunə hazırlığı proseslərində iştirak edir, maye xromotoqrafiya, UV- spektrofotometr və infraqırmızı spektrofotometr kimi yüksək həssaslığa malik cihazların iş prinsipləri ilə tanış olur və həmin cihazlarda işləmə vərdişlərinə yiyələnirlər.
Eyni zamanda, əlavə ekspress metod olan PZR cihazı vasitəsilə patogen və qeyri-patogen mikroorqanizmlərin təyini, ət və ət məhsullarında mənşə təyinində iştirak edən Tibb Universitetinin təcrübəçi tələbələri bəzi qida məhsullarında GMO analizlərinin aparılması prinsiplərini də öyrənirlər.
Bölmənin digər xəbərləri
