Qılıncoynadanımız Bolqarıstanda keçirilən turnirdə qızıl medal qazanıb
Bakı, 19 noyabr, AZƏRTAC
Qılıncoynatmanın sablya növü üzrə yeniyetmələrdən ibarət milli komandamızın üzvü Abbas Hüseynov Bolqarıstanın Sofiya şəhərində keçirilən "Etropolski" turnirində qızıl medal qazanıb.
Azərbaycan Qılıncoynatma Federasiyasının mətbuat xidmətindən AZƏRTAC-a bildiriblər ki, 14 yaşadək yeniyetmə oğlanların yarışında qrup mərhələsini 4 qələbə ilə başa vuran Abbas Hüseynov finala gedən yolda ispan Qabriel Suarez (15:3), yunan Kristos Karamitsos (15:12) və bolqar Konstantin İvanovu (15:10) məğlub edib. Abbas ən güclü 4-lüyə yüksəlmək uğrunda keçirilən görüşdə yunan Vangelis Koutlasa 15:4 hesabı ilə qalib gəlib.
İdmançımız gərgin keçən yarımfinal görüşündə bolqar Nikola Meitsovu (15:14) mübarizədən kənarlaşdırıb.
Abbas Hüseynov həlledici görüşdə Rumıniya təmsilçisi Matei Raduya 15:7 hesabı ilə qalib gələrək 13 ölkədən 66 iştirakçı arasında turnirin qızıl medalını qazanıb.
Bölmənin digər xəbərləri
