QUBADLI RAYON İCRA HAKİMİYYƏTİNİN BAŞÇISI MALİK İSAQOVUN ÇIXIŞI
-Zati-aliləri möhtərəm cənab Prezident!
Bu gün hamıya məlumdur ki, əgər ulu öndərimiz Heydər Əliyevin qətiyyətli, çevik tədbirləri olmasaydı, dağlıq rayonda yaşamış insanların 1993-cü ilin qızmar yay günlərində birdən-birə aran bölgələrinə səpələnməsi ikinci fəlakətə, onların bütünlüklə məhvinə səbəb ola bilərdi.
Yurd-yuvalarından didərgin düşmüş insanlar ümummilli liderimizin gördüyü tədbirlər nəticəsində qısa bir vaxtda, əsasən, yaşayış üçün müəyyən şəraiti olan binalarda yerləşdirildi. Onların minimum yaşayışının təmin edilməsi üçün dövlət tərəfindən lazımi tədbirlər həyata keçirildi, rayonun bütün idarəetmə strukturları bərpa olundu.
Ulu öndərimizin ürək ağrısı ilə “Çadırlarda yaşayan məcburi köçkünlərin üzərinə yağan yağış, qar, belə hesab edirəm ki, mənim üzərimə yağır” - deməsi, məcburi köçkünlərin yaşayış şəraitinin yaxşılaşdırılması istiqamətində həyata keçirilən ardıcıl tədbirlər o ağır vaxtlarda, elə indinin özündə də, məcburi köçkünlər üçün həyati əhəmiyyət kəsb edən, sabaha inam yaradan bir stimul oldu. Çətin şəraitdə yaşayan insanların dözümünə dözüm qatdı, haradasa ümidi zəifləmiş insanların problemlərinin daim ölkə başçısının diqqətində olduğunu anlatdı.
Böyük qürur hissi ilə demək lazımdır ki, ulu öndərimizin qaçqın və məcburi köçkünlərə göstərdiyi gündəlik qayğı bu gün Sizin tərəfinizdən uğurla davam etdirilir. Həyata keçirilən bütün tədbirlər onu göstərir ki, bu problemə Siz böyük ürək ağrısı ilə yanaşırsınız. Buna görə də Sizə bütün qubadlılıların minnətdarlığını, hörmət və ehtiramını çatdırıram.
Məlumat üçün bildirmək istəyirəm ki, Qubadlı rayonundan olan 32 min nəfər məcburi köçkün respublikanın 5 şəhəri və 26 rayonunda müvəqqəti məskunlaşmışdır. Məcburi köçkünlərin məskunlaşdığı binalar Dövlətqaçqınkomun köməyi ilə yaşayış üçün uyğunlaşdırılmış, bəzi yataqxana və pansionatlarda təmir işləri görülmüş, on kilometrlərlə yeni elektrik, su, qaz xətləri, yeni yollar çəkilmişdir. Sumqayıt şəhərində müasir tələblərə cavab verən rayon mərkəzi xəstəxanasının poliklinika binası tikilib məcburi köçkünlərin istifadəsinə verilmişdir.
YUNESKO və İSESKO-nun xoşməramlı səfiri, Heydər Əliyev Fondunun prezidenti, Milli Məclisin deputatı Mehriban xanım Əliyevanın təşəbbüsü ilə ölkəmizdə məktəb tikintisi geniş vüsət almışdır. Məlumat üçün bildirirəm ki, 2003-cü ildən etibarən qubadlılılar üçün hər cür şəraiti olan 11 yeni məktəb binası tikilmiş, 19 məktəbdə əsaslı təmir işləri aparılmışdır. Məktəblərimizin maddi-texniki bazasının yaxşılaşdırılması təhsilin keyfiyyətinə də müsbət təsir göstərmiş, ali məktəblərə qəbul göstəriciləri xeyli yaxşılaşmışdır. Bunun nəticəsidir ki, test imtahanlarında yüksək bal toplayaraq, Prezident təqaüdünə layiq görülmüş tələbələrdən 3-ü məhz bizim məktəblərin məzunlarıdır.
Məktəblərimizin idman salonları həm də rayon gəncləri arasında idmanın inkişafına xidmət göstərən bir vasitəyə çevrilmişdir. Çaytumas kənd orta məktəbinin bazasında fəaliyyət göstərən “Qubadlı” idman klubunun kikboksinqçiləri dəfələrlə beynəlxalq yarışların qalibi olmuş, Dünya kubokunu qazanmış, Azərbaycanın idman şərəfini ləyaqətlə qorumuşlar.
Hazırda 19 min 800 nəfər əmək qabiliyyətli əhalimiz vardır. Onlardan 10 min 337 nəfəri büdcə təşkilatlarında və kommersiya strukturlarında çalışır. Son illərdə 1496 yeni iş yeri açılmışdır.
Hörmətli cənab Prezident, icazənizlə, məcburi köçkünləri narahat edən bəzi problemlərə də toxunmaq istərdim.
Sumqayıt şəhərində məcburi köçkünlərin müvəqqəti məskunlaşdıqları binaların çoxunun təmirinə, kommunikasiya xətlərinin dəyişdirilməsinə və həyətlərinin abadlaşdırılmasına ciddi zərurət duyulur.
Bir məsələni də diqqətinizə çatdırmaq istərdim. Bu il, deyərdim ki, Qubadlıda təhsilin anası sayılan Qara İlyasov adına 1 nömrəli Qubadlı şəhər məktəbinin 125 ili tamam olur. Qubadlıda təhsil şəbəkəsi 1882-ci ildə açılmış bu məktəbin bazası əsasında qurulmuşdur. Vaxtilə həmin məktəbi bitirənlər arasından çoxlu yazıçı, şair, elm və incəsənət xadimləri, tanınmış ictimai və dövlət xadimləri, akademiklər, elmlər doktorları çıxmışdır. Həmin məktəbin yubileyinin keçirilməsi üçün Sizin xeyir-duanızı xahiş edirik.
Cənab Prezident, qaçqınların və köçkünlərin həyat şəraitinin yaxşılaşdırılması ilə bağlı gördüyünüz bütün tədbirlər, çadır düşərgələrinin ləğvi, yeni qəsəbələrin salınması bu insanlarda Sizə olan inamı, hörmət və ehtiramı günbəgün artırır. Məhz aparılan uğurlu siyasətin nəticəsidir ki, heç bir sosial dayağı olmayan müxalifət, sadəcə, tarixin arxivində özünə yer tapa bilibdir. Camaatımızda sağlam, işgüzar mühit formalaşıb, Sizin yeritdiyiniz siyasət hamı tərəfindən birmənalı şəkildə dəstəklənir. Ən ağrılı problemimiz olan torpaqlarımızın işğaldan azad olunması yolunda Ali baş komandan kimi atacağınız hər bir addımı da birmənalı şəkildə dəstəkləyəcəyik. Əgər qərar qəbul etsəniz, biz döyüşə də hazırıq.
Qubadlılılar həmişə dövlətə, dövlətçiliyə, ölkə Prezidentinə sadiq olublar və əmin ola bilərsiniz ki, bundan sonra da belə olacaqdır.
Bölmənin digər xəbərləri
