DÜNYA
“Rafael” qasırğası Kubada elektrik sistemini sıradan çıxarıb
Bakı, 7 noyabr, AZƏRTAC
“Rafael” qasırğası Kubada elektrik enerjisinin kütləvi kəsilməsinə səbəb olub.
AZƏRTAC xəbər verir ki, Kuba dövlət enerji şirkətinin məlumatına görə, bundan öncəki miqyaslı elektrik kəsilməsindən təxminən üç həftə sonra qasırğa adanın elektrik şəbəkəsi sistemini yenidən sıradan çıxarıb.
Meteoroloqlar bildirirlər ki, Karib hövzəsində tüğyan edən “Rafael” qasırğasının mərkəzində küləyin sürəti saatda 185 kilometrə çatıb. Hazırda qasırğa Kubanın qərbindən Meksika körfəzinin cənub-şərqinə doğru irəliləyir. Hakimiyyət orqanları qasırğanın adada güclü küləklərə, hündür dalğalara və daşqınlara səbəb olacağı barədə xəbərdarlıq edib.
Qeyd edək ki, oktyabr ayında “Oskar” qasırğası Kubanın şərqində azı 7 nəfərin həyatına son qoyub və on milyon insan bir neçə gün işıqsız qalıb.
