Sentyabrın 24-də Azərbaycan Prezidenti İlham Əliyev Elm Mərkəzinin qarşısındakı parkda rayon ictimaiyyətinin nümayəndələri ilə görüşdü.

Azərbaycan Yazıçılar Birliyi Qazax bölməsinin rəhbəri şair BARAT VÜSAL dövlətimizin başçısını salamlayaraq dedi:

- Cənab Prezident, bu gün Qazaxda geniş quruculuq işləri, sürətli inkişaf, yeniləşmə gedir. Bu, bizi çox sevindirir və qarşısında dayandığımız, açılışında iştirak etdiyiniz Heydər Əliyev Elm Mərkəzi, eləcə də bu gün açılışı olacaq Müalicə-Diaqnostika Mərkəzi buna sübutdur. Bundan əvvəl Qazaxda Olimpiya İdman Kompleksi istifadəyə verilmiş, çoxlu işçi qüvvəsi tələb olunan sement zavodu tikilmiş, xalqın istirahət yerinə çevrilmiş Heydər Əliyev parkı, Mütəfəkkirlər parkı salınmış, tariximizə məhəbbətin nişanəsi olan Dədə Qorqud abidə kompleksi yaradılmışdır. Bu, nəyi göstərir?! Onu göstərir ki, ulu öndərimiz Heydər Əliyevin xətti uğurla davam etdirilir. Bu, bizi çox sevindirir.

Hörmətli Prezident, Sizin belə bir sözünüz var: “Biz gərək bütün şəhərlərimizi yeniləşdirək”. Siz yeniləşməni sevirsiniz, yeniləşmə, yeniləşmə, daim yeniləşmə Sizin amalınızdır. Bu gün Qazaxda gedən yeniləşmə də bunu sübut edir. Sizin Qazax haqqında çox maraqlı fikirləriniz var. Onlardan birini xatırlatmaq istəyirəm: “Qazax Azərbaycanın paytaxtdan uzaq ən ucqar rayonlarından biridir. Ona görə də oraya xüsusi diqqət və qayğı göstərilməlidir”. Biz qazaxlılar bunu hər dəqiqə, hər an hiss edirik. Qazaxda böyük yeniləşmə, inkişaf gedir. Ölkədə maliyyə kapitalı insan kapitalına çevrilir. Həqiqətən də, inkişafın yolu budur. Dünya praktikası da bunu göstərir.

Onu da deyim ki, Sizin silahdaşınız, YUNESKO-nun və İSESKO-nun xoşməramlı səfiri, Heydər Əliyev Fondunun prezidenti, xalqımızın sevimlisi Mehriban xanım Əliyeva da çox böyük işlər görür. Biz minnətdarlığımızı buradan ona çatdırırıq. Yeni məktəblərin açılmasında, səhiyyə ocaqlarının tikilməsində, ümumiyyətlə, Azərbaycanda gedən abadlıq və quruculuq işlərində bir silahdaş, məsləkdaş kimi onun Sizin yanınızda olmasını çox bəyənirik.

Ulu öndər rayonumuza çox böyük diqqət və qayğı ilə yanaşırdı, insanlara yüksək qiymət verirdi. Ulu öndər Qazaxı necə sevirdisə, Siz də elə sevirsiniz.

Bu gün dünyanın hər yerində Azərbaycan bayrağı dalğalanır, ölkədə sabitlik hökm sürür, dinamik inkişaf var, iqtisadiyyatımız sürətlə inkişaf edir, ölkənin müdafiə qabiliyyəti artır. Buna hər birimiz sevinirik. Sağ olun.

İLHAM ƏLİYEV: Mən sizi ürəkdən salamlayıram. Yenidən Qazaxda olmağımdan da çox şadam. Hər dəfə buraya gələndə, yenilikləri görəndə mən çox sevinirəm. Siz düz söyləyirsiniz, mənim istəyim odur ki, bütün ölkəmiz yeniləşsin, müasirləşsin, ancaq öz tarixi simasını saxlamaq şərti ilə. Biz Qazaxın timsalında bunları görürük. Mən son beş il ərzində beşinci dəfədir Qazaxdayam. Hər dəfə gələndə yeniliklər görürəm. Bax, indi açılışında iştirak edəcəyimiz yeni müasir Müalicə-Diaqnostika Mərkəzi ən yüksək dünya standartlarına cavab verir. Yəni dünyada, ən inkişaf etmiş ölkələrdə, şəhərlərdə hansı avadanlıq varsa, burada da var. Rayonun parkları, binaları, körpüləri, Olimpiya İdman Kompleksi, yəni bütün bunlar rayonun inkişafına, insanların daha da yaxşı yaşamasına xidmət göstərir. Həm iqtisadi məsələlər həll olunur, iş yerləri açılır, həm sosial məsələlər həllini tapır - məktəb, xəstəxanalar tikilir və sair, həm də gözəllik, abadlıq yaradılır. Siz də bu yeri yaxşı xatırlayırsınız, mən də yaxşı xatırlayıram. İlk dəfə on il bundan əvvəl burada olmuşam. Görürsünüz, necə gözəl park yaradılıbdır. Əvvəl park yaradıldı, ondan sonra ulu öndərin abidəsi qoyuldu, bu dəfə də Elm Mərkəzinin açılışında iştirak edirik. Burada quraşdırılan texnika Azərbaycanın başqa heç bir yerində yoxdur. Siz onu bilirsiniz.

Azərbaycanın uğurlu inkişafı bax, bu yolla getməlidir və bu yolla gedir: hər bir rayonun inkişafı, hər bir kəndin abadlaşması. Əlbəttə, mən o sözləri yaxşı xatırlayıram, paytaxtdan uzaqda yerləşən rayonlara ən böyük diqqət göstərilməlidir, xüsusilə sərhəd rayonlarına. Qazax həm sərhəd rayonudur, həm də Bakıdan ən uzaqda yerləşən rayondur. Burada abadlıq, quruculuq, inkişaf sürətlə gedəndə, o deməkdir ki, bu, bütün Azərbaycanı əhatə edir. Hər bir rayonda özünə məxsus olan inkişaf var. Hər bir rayonda xüsusi proqramlar var və regionların sosial-iqtisadi inkişafı Dövlət proqramının icrası, demək olar ki, başa çatıbdır. Beşillik proqram başa çatıbdır. Orada nəzərdə tutulmuş bütün məsələlər öz həllini tapıbdır. Növbəti beş il üçün yeni proqram hazırlanacaq və orada daha geniş işlər nəzərdə tutulur.

İndi Qazaxı Bakı ilə birləşdirən avtomobil yolunun, demək olar ki, böyük hissəsi tikilib, az hissə qalıbdır. Yəni bütün bunlar rayonun inkişafına, hər bir vətəndaşın yaxşı yaşamasına xidmət göstərir. Bizim vətəndaşlar bu gün yaxşı yaşamalıdır. Bilirsiniz ki, keçmişdə, Sovet İttifaqı zamanında deyirdilər ki, gəlin əziyyət çəkək, nə vaxtsa parlaq gələcək olacaqdır. Əlbəttə, biz öz strategiyamızı uzunmüddətli əsaslarla qurmuşuq və növbəti illərdə, 5-10 ildən sonra nə baş verəcək, onu bilirik. Ancaq mən istəyirəm ki, Azərbaycan vətəndaşları bu gün yaxşı yaşasınlar. Bax, bu gün gözəl tibbi xidmətdən istifadə etsinlər, uşaqlar yaxşı məktəblərdə oxusunlar, insanlar yaxşı işlə təmin olunsunlar, yaxşı maaş alsınlar. Bütün bu istiqamətlərdə bizim proqramlarımız var və onların təməlində iqtisadi islahatlar durur. Çünki bu olmasa, bunların heç birini etmək mümkün olmayacaqdı.

Əgər vaxtilə ulu öndər Heydər Əliyev tərəfindən neft strategiyası həyata keçirilməyə başlamasaydı, indi Neft Şirkətinin imkanı olmayacaqdı ki, belə gözəl bina tiksin, avadanlıqla təchiz etsin. Yəni bütün bunlar bir-biri ilə bağlı olan məsələlərdir. Bizim bugünkü uğurlarımızın təməli 10-15 il bundan əvvəl qoyulmuşdur. Biz, sadəcə olaraq, yeni çağırışlara hazır olmaqla bu siyasəti davam etdiririk və Azərbaycanın hər bir bölgəsini müasirləşdiririk. İnfrastruktur, sosial, iqtisadi, sənaye və humanitar məsələlərin həlli - bütün bunlar kompleks şəkildə, əlbəttə, ölkənin uğurlu inkişafını təmin edəcəkdir. Bütün bunlara nail olmaq üçün ölkədə sabitlik, əmin-amanlıq necə varsa, elə də davam edəcəkdir. Xüsusilə indiki zəmanədə dünyada gedən proseslər artıq əvvəlki illərdən daha fərqlidir. Dünyada beynəlxalq davranış qaydaları bəzi hallarda pozulur. Beynəlxalq hüquq normalarına əməl edilmir. Yəni biz növbəti bir tarixi mərhələyə qədəm qoyuruq. Biz möhkəm olmalıyıq - həm müdafiə gücümüz, həm sabitlik, həm də inkişaf.

Azərbaycan özünü təmin edən ölkədir, başqa ölkələrin yardımından asılı deyildir. İstər iqtisadi baxımdan, istərsə də siyasi baxımdan biz müstəqil siyasət aparırıq, Azərbaycan xalqının iradəsinə əsaslanaraq müstəqil siyasət aparırıq. Müstəqil siyasət ən düzgün siyasətdir. Çünki bu siyasət öz xalqının maraqlarına xidmət göstərir. Belə olan halda, ölkə daha da güclənir. Bu gün Azərbaycan dünyada ən sürətlə inkişaf edən ölkədir. Bunu həm biz deyirik, həm də bütün beynəlxalq maliyyə qurumları və sair deyir. Dörd il ərzində biz iqtisadi inkişaf baxımından birinci yerdəyik. Bu, böyük məsələdir. Biz, sadəcə, artıq buna bir növ öyrəşmişik. Hamıya da elə gəlir ki, belə də olmalıdır. Amma belə olmaya da bilərdi. Bugünkü reallıqların təməlində, bir daha deyirəm ki, 10-15 il bundan əvvəl başlanmış islahatlar və indiki uğurlu inkişafımız, konkret proqramlar və xalqla iqtidar arasında birliyin olması dayanır. Bütün bu amillər birlikdə bugünkü inkişafı təmin edir. Biz Qazax rayonunun timsalında bunu görürük. Rayon necə gözəlləşir, abadlaşır, burada necə gözəl binalar tikilir. Mən şübhə etmirəm ki, növbəti illərdə biz bu siyasətlə ölkəmizi daha da hərtərəfli inkişaf etdirəcəyik.

Mən bu işlərdə sizə və bütün qazaxlılara uğurlar arzulayıram və biz görüşəcəyik.

X X X

Azərbaycanın güləş üzrə yeniyetmələrdən ibarət yığma komandasının baş məşqçisi Firdovsi Umudov idmançılara yaradılan şəraitə görə dövlətimizin başçısına təşəkkür etdi və bildirdi ki, rəhbərlik etdiyi komanda Avropa çempionatına hazırlıq prosesini Qazax Olimpiya İdman Kompleksində keçmişdir. Bu da bölgələrdə idmanın inkişaf səviyyəsindən xəbər verir.

Sonra Prezident İlham Əliyevə rayon ictimaiyyəti adından xatirə hədiyyəsi, Qazaxda görülən abadlıq-quruculuq işlərini əks etdirən fotoalbom hədiyyə olundu.

######